Сарвар Холматов: "Иттифоқ-Навоий" вақтинчалик жамоа эмас"

Биз мазкур жамоа сардори, тажрибали футболчи Сарвар Холматов билан боғланиб, “Иттифоқ-Навоий"нинг келажакдаги режалари хусусида интервью ташкилладик.

- Клубимиз-Ўзбекистон Ёшлар Иттифоқи васийлигида мусобақаларда иштирок этмоқда - дейди Сарвар Холматов. - Ўз навбатида жамоамиз вақтинчалик ташкил этилган эмас, келажакда юқори марраларни забт этишни мақсад қилганмиз. Бу йилги мавсумда жамоамиз олдидаги вазифа А ПРО-Лига йўлланмасини қўлга киритишдан иборат.

Ҳомийларимиз кўмаги остида яқин орада "Иттифоқ-Навоий” жамоасининг янги замонавий стадиони ва машғулотлар базасини барпо этиш ишлари режалаштирилмоқда. Клуб раҳбарияти, хусусан Навоий вилояти Ёшлар Иттифоқи раиси ўзи бош-қош бўлган холда мана шу олдимизда бажарилиши оширилиши лозим бўлган ишларни назоратига олган. Ҳар бир ўтказаётган учрашувларимизда Навоий вилояти Ёшлар Иттифоқи вакиллари иштирок этиб келмоқдалар.

Жамоамиз уй ўйинларини ҳозирча Қизилтепа туманидаги стадионда ўтказиб келмоқда. "Иттифоқ-Навоий" жамоаси Ўзбекистон кубоги баҳсларининг 1/16 босқичига йўлланмани қўлга киритди. Насиб қилса, астойдил ҳаракат қилиб кубок баҳсларида имкон қадар узоқроққа бормоқчимиз. Яқин кунларда Ўзбекистон кубоги 1/16 босқичи баҳсларига қуръа ташланади ва навбатдаги рақибимизни билиб оламиз. Ҳозир бор эътиборимизни кубок баҳсларига қаратганмиз.

Бекзод Толибов ёзиб олди