Сардор Зокиров: "Цементчи" осон ўтмаган мавсум якунида Биринчи лигага йўлланмани қўлга киритди"

Жамоа бош мураббийи Сардор Зокиров ортда қолган мавсум давомида босиб ўтилган йўл ва амалга оширилган ишлар ҳақида фикрларини билдириб ўтди.

"Цементчи" осон бўлмаган оғир мавсум ўтказди. Жамоамиз таркиби асосан маҳаллий футболчилардан шакллантирилган. Таркибимизда бир нафар нигериялик легионер футболчи ҳаракат қилди.

"Цементчи" Фарғона  вилояти футбол ассоциацияси томонидан ташкил этилган вилоят кубоги мусобақасида ғолибликни қўлга киритди. Шундан сўнг Қарши шаҳрида ташкил этилган "Худудий кубок эгалари кубоги" мусобақсида иштирок этдик. Жами 9 та жамоа иштирок этган мазкур мусобақада 2-ўринни қўлга киритдик. Бу натижа бизга Биринчи лигага ўтиш ўйинларида қатнашиш ҳуқуқини берди.

Бухоро шаҳрида бўлиб ўтган ўтиш ўйинлари юқори савияда ташкил этилди. Биз ушбу мусобақанинг финалига қадар етиб бордик ва якунда янги мавсумдан Биринчи лигада ўйнаш ҳуқуқини қўлга киритдик. Жамоамиз кўрсатган натижадан хурсанд бўлган футбол мухлислари ва мутасадди ташкилотлар вакиллари бизни Фарғонада ажойиб тарзда кутиб олишди. Янги мавсумда ҳам "Цементчи" фақат юқори мақсадларни кўзлаган холда давом этади. Бизни қўллаб-қувватлаб турган клубимиз раҳбарияти ва жамоамиз мухлисларига миннатдорчилик билдираман", – деди ёш мутахассис.

Бекзод Толибов ёзиб олди