Санжар Шоаҳмедов: “Ойнинг энг яхши ўйинчиси бўлишимни кутмагандим”

Унга кўра “Энг яхши футболчи” дея ОАВ ходимлари Санжар Шоаҳмедовни муносиб кўрди. Тошкентнинг “Локомотив” клуби аъзоси ҳақиқатдан ҳам қисқа муддат ичида, ёрқин ўйинлари эвазига мухлису-мутахассисларнинг эътиборини ўзига торта олди. Йил бошида “темирйўлчилар” сафига келиб қўшилган Шоаҳмедов учун умуман олганда, мавсум ижобий ўтмоқда дейиш мумкин. Боиси Санжар янги жамоасига тез мослашиб кетиш билан бир қаторда, асосий таркибнинг муҳим бир аъзосига ҳам айлана олди. Куни-кеча Шоаҳмедовдан бу ҳақида интервью олдик.

- Тўғриси, август ойининг “Энг яхши” футболчиси бўлишимни кутмагандим. Бу мен учун қувончли ва шу билан бирга кутилмаган хабар бўлди. Бу ҳақда биринчи бўлиб, яқин дўстимдан эшитдим. У ҳам сайтда ўқиб қолган экан. Кейин менга айтиб қолди. Бошида ишонмагандим, очиғи. Кейин ўзим кириб ўқидим ва бунга амин бўлдим.

- Ўзимга қолса кимга овоз берган бўлардим? (Бироз ўйланиб) Тўғриси, бу борада бир нарса дейиш қийин. Кимгадир овоз бериб, бошқасини ранжитиб қўйишни истамасдим. Шунинг учун яхшиси бунга мутахассислар ва мухлислар овоз бергани маъқул.

- Ҳақиқатдан ҳам август ойи мен учун ажойиб ўтди дея оламан. Негаки, жамоам иштирокидаги ўйинларда қатнашдим ва миллий терма жамоадан ҳам чақирув олдим. Бир неча голлар урдим. Тақдиримдан нолимайман. Умид қиламанки бу мен учун чўққи бўлиб қолмайди ва келгусида ҳам янада яхшироқ бўлишга интиламан – дейди Санжар Шоаҳмедов.

Исломбек Рустамбеков.