Рўзиқул Бердиев: "Мухлислар биздан мўъжиза кутишганди"

"Насаф" бош мураббийи Рўзиқул Бердиев "Бунёдкор"дан учралган мағлубиятдан сўнг жамоа Суперлигада "кучли олтилик"ка кириш мақсадига эриша олмаганини қайд этиб ўтди.

- "Бугунги учрашувда кучли жамоа ғалаба қозонди. “Бунёдкор” бизга нисбатан анча кучли ўйин кўрсатди ва хақли ғалабага эришди. Агар пенальтидан фойдаланганимизда, балки ўйинни ўз тарафамизга оғдирган бўлардик. Афсуски, бу амалга ошмади. Қизил карточка ҳам ўз таъсирини кўрсатмай қолмади. Шунингдек, Ғолиб Ғайбуллаевнинг бошидан олган жароҳати туфайли мажбурий ўзгаришни амалга оширишга тўғри келди. "Бунёдкор" яратилган вазиятларини голга айлантира олгани уларга қўл келди. Афсуски, мақсадимиз бўлган "кучли олтиталик"ка киришни уддалай олмадик. Биз ҳам, мухлисларимиз ҳам бундай ҳолатларга тайёр бўлишлари лозим. Таркибимиздаги етакчилар жамоани тарк этгани ўз сўзини айтмасдан қолмади. Ҳозирги мавжуд таркибимиздан мўъжиза кутишди, аммо буни амалга ошириш ниҳоятда қийин иш эди. Учрашувларда кўплаб вазиятлар яратилмоқда, имкониятга эга бўляпмиз, аммо уларни голга айлантиришда тажриба етишмаётганлиги панд бермоқда. Ҳозирги "Насаф"нинг ёшлари учун бу каби ўйинлар катта тажриба мактаби бўлиши аниқ. "Насаф" ёшларининг келажаги порлоқ", - дея ўз фикрларини билдириб ўтган Рўзиқул Бердиев.