Роналдудан ибрат олган «безори»

«Ювентус»га сотиб юборилган Гонсало Игуаин ўрнига олинган польшалик ҳужумчи ўзи учун сарфланган 35 млн. еврони тўла-тўкис оқламоқда - дастлабки 5та учрашувда 3 марта «дубл»-га эришди. Ваҳоланки, неаполликлар Милик трансферига Игуаин учун олинган маблағнинг учдан бир қисмини беришди, холос. Таққослаш учун айтсак, аргентиналик ҳужумчи ўтган мавсумнинг 5та учрашувида 4та гол урганди. Майли, математикани бир четга сурайликда, «А» сериясининг янги юлдузи қаердан пайдо бўлгани ҳақида гаплашайлик.

Ота ўрнини босган мураббий

Оила бошлиғи уйга ҳушёр қайтган кунлар Миликлар хонадони учун чинакам байрам эди. Зеро, Аркадиушнинг отаси доимо кўчадаги дайди ичувчилар билан улфатчилик қилар, бир неча йилга чўзилган бу ёқимсиз жараён охир-оқибат, оиланинг парчаланишига олиб келганди. Умуман, пиёниста ота оламдан ўтганида, Аркадиуш атиги 6 ёшда эди. Хуллас, у ва 8 ёш катта акасининг тарбияси ёлғиз она зиммасига тушганди. Онаизор фарзандлари лоақал оч қолмасликлари учун ҳар куни 12 соатдан ишларди. Меҳрибон она эътиборидан бутунлай маҳрум бўлган болакай эса кун бўйи мўъжазгина Тиха шаҳарчаси кўчаларида тентираб юрар, қўлбола папирослардан татиб кўрарди. Энг ёмони, Аркадиуш дўконлардан майда-чуйда нарсаларни ўмаришга одатланиб, аста-секин дайди-безорига айланади. Шундай кунлардан бирида Аркадиушнинг акаси билан тўп ўйнаётгани ва кучли зарба йўллагани футбол мураббийи Славомир Могилан эътиборини тортади. Агарда қўшни уйда истиқомат қиладиган шу мутахассис унга бепарво қараганида, эҳтимолки, «Наполи» бугун шундай ажойиб ҳужумчига эга бўлмасми-ди? Славомир аслида Миликлар оиласининг муаммоларидан хабардор бўлсада, олдинроқ бирор ёрдам беролмаганди. Чунки вилоят марказида Аркадиуш ёшига мос жамоа йўқ эди. Бироқ болакайнинг онаси безори ўғли билан алоҳида шуғулланишини илтимос қилгач, мураббий бир иложини топиб, Аркадиушни ўзидан каттароқ - 1991 йилда туғилган болалар гуруҳига жойлаштиради.

Қарангки, ёш ўртасидаги фарқ (16 йил) «безори» ва мураббийнинг апоқ-чапоқ бўлиб кетишларига халал бермади. Улар мактабдаги умумий машғулотлардан кейин қўшимча машқлар ўтказишар, ҳаттоки, дам олиш кунлари ҳам астойдил тер тўкишарди. Шу зайл 11 йил ҳамкорлик қилишди ва Милик 17 ёшга тўлди. «Нимага эришган бўлсам, барчаси шу мураббий туфайли юзага келди. Муҳими, у мени безорилар тўдасидан халос этиб, ҳаётимни сақлаб қолди, чинакам инсонга айлантирди. Славомир таъсирида футболга меҳр қўйганимни очиқ тан оламан»,- дейди Аркадиуш. Аммо Могиланнинг ўзига Миликни тарбиялагани, отаси ўрнига оталик қилгани ҳақида гапирилса, у самимий табассум билан камтарона жавоб қайтаради: «Йўқ, шунчаки, инсофли кишига хос иш қилдим. Ҳарқалай, Аркадиуш муваффақиятларга ўз меҳнати эвазига эришди».

Ишонч билдирган мураббий

Ўсмирлар ўртасидаги мусобақаларда доимий тўпурарга айланган Милик 17 ёшида «Тоттенхэм»дан таклиф олди. Бироқ ўшанда онаси ва акасидан олисда яшашга тайёр эмасди. Шу боис, таклифга қиё ҳам боқмади. Ўз юртида эса, ҳозирда Польша термасига устозлик қилаётган Адам Навалканинг собиқ клуби - «Гурник» бошқаларга кўра, фаолроқ ҳаракатланди. Профессионал жамоа сафига қўшилиш Аркадиуш учун чинакам бахт эди. Тўғри, у аввалига ўз ўйинини топиб олишда роса қийналди. Лекин Навалка йигитчанинг хато ва камчиликларига ортиқча эътибор қаратмади. Ўзингиз ўйланг, қаторасига 17та ўйинда гол уролмаган ҳужумчига ишонч билдиравериш учун катта жасорат керак. Хуллас, Навалка трибуналар ҳайқириғига парво қилмади, аксинча,  Аркадиушдан доимо оиласидаги ҳолат, қай тарзда ҳаёт кечираётгани ва шифокор кўригига борган-бормагани хусусида сўраб турди. Милик охирги марта 2 йил аввал стомотолог ҳузурида бўлганини эшитганида эса, Навалка шунчаки, чидолмади: «Бундай эътиборсизлик организмнинг яллиғланишига олиб келиши мумкин. Мана, малакали мутахассиснинг манзили. Зудлик билан унинг қабулига бор». Орадан 1,5 йил ўтгач, 11та гол урган ҳужумчини «Байер» ўз таркибига қўшиб олди. «Гурник» эса трансфер учун 2,6 млн. евро олди.

Мураббий Бергкамп

Германияда Аркадиушнинг ишлари қовушмади. Дортмунд «Боруссия»си учун ишлайдиган селекционер Артур Платекнинг фикрича, Милик мослашиш масаласида ҳеч қандай муаммога дуч келган эмас. Бар-ча омадсизликлар  ҳужумчининг ўз иқтидори билан чекланиб қолганига боғлиқ эди: «У асосан чап оёғини ишга солади. Дейлик, дарвозага терс турган ҳолда, тўпни қабул қилганидан кейин аввало, чап томонга югуради. Рақибни алдаб ўтгач, қайси томонга бурилади? Яна чап тарафга. Аркадиуш шу ўта жўн ҳаракатлари туфайли бундеслигада ҳимоячилар қурбонига айланди. Зеро, рақиблар унинг йўналишини олдиндан билардилар». Шу зайлда тўп сурган ҳужумчи Германия чемпионатида атиги 2та гол урди. Футболчини «Аугсбург» захирасидан («Байер» ижара асосида бериб юборганди) «Аякс»га олиб ўтишганида, Амстердам ҳайратдан ёқа ушлади. Бироқ ҳайронлик узоқ давом этмади. Чунки польшалик ҳужумчи билан шахсан Деннис Бергкампнинг ўзи шуғуллана бошлади. «Аркадиушнинг чап оёғи ажо-йиб хусусиятларга эга. Бу оёғи билан жуда кучли ва аниқ зарба беради. Ҳар қандай масофадан, ҳаттоки, ўта ноқулай вазиятдан ҳам дарвозанинг исталган нуқтасини нишонга олишига аллақачон амин бўлдим. Қолаверса, Милик доимо ҳаракатда, бўшлиқ излаш билан банд. Лекин камчиликлари йўқ эмас. Биринчи навбатда, ўнг оёғидан ҳам унумли фойдаланишни ўрганиши лозим»,- деганди Бергкамп ўз вақтида. Охир-оқибат, голландиялик мутахассис польшалик шогирдини ўнг оёқ билан кўпроқ ишлашга мажбур этди. Натижада Милик универсал ҳужумчига айланди. «Бергкамп билан самарали ҳамкорлик - бу тақдирнинг туҳфаси! Биз узоқ вақт дарвозага зарба бериш техникаси устида ишладик. Шунингдек, тўпни олиб юриш, уни назорат қилиш борасида ҳам. Деннис жуда кўп қимматли маслаҳатлари билан ўйин услубимга сезиларли таъсир ўтказди»,- дейди Аркадиуш.

Эталон нусхаси - Криштиану Роналду

Милик айнан португалиялик юлдузга ҳавас қилиб, шу даражага чиққанини ҳам очиқ тан олади: «Бундан бир неча йил муқаддам Криштиану Роналдудан кўп нарсаларни ўрганишга қарор қилгандим. Унга ўхшаш футболчилар ижросидаги  ўйинлардан шунчаки, илҳом олиш лозим. Болалигимда қанотларда тўп суришни ёқтирардим. Чунки айнан шу ҳудудларда бўшлиқлар кўпроқдек туюлар, тўпни бемалол назорат қилиш, турли финтлар кўрсатиш мумкиндек эди. Яна Роналду услуби ҳам мени ром этганди. Лекин вақт ўтиши билан ўрним қанотлар эмас, марказда эканлиги ойдинлашди. Яъни шу позицияда кўпроқ манфаат келтиришимни англадим. Шундан кейин услубим бутунлай ўзгариб кетди. Лекин Роналдуга ҳавас сўнмади, барибир».

Ж.АБДУВАЛИХЎЖАЕВ тайёрлади