Расман: Мухсинжон Низомиддинов — "Қўқон-1912" бош мураббийи

Бир неча кун аввал "Қўқон-1912" жамоаси раҳбарияти Даврон Файзиевнинг истеъфони қабул қилганди.

Бугун эса клуб жамоага янги бош мураббий сифатида Мухсинжон Низомиддинов тайинлангани эълон қилди.  

Мухсинжон Низомиддинов Қўқон футболининг яқин ўтмишдаги юлдузи ҳисобланади. Фаолияти давомида юртимизнинг кўзга кўринган "Насаф", "Нефтчи" каби жамоалари сафида ёрқин ўйинлари билан мухлисларнинг меҳрини қозонган. Мураббийлик фаолиятида эса "Қўқон-1912" У-21 жамоаси билан чемпионат баҳсларида бронза медалларни қўлга киритган. У кўплаб иқтидорли ва кучли футболчиларнинг мураббийи ҳисобланади. Унинг шогирдлари ҳар хил ёш тоифасидаги терма жамоаларда ҳаракат қилиб, Осиё чемпионатида ғолибликни қўлга киритишган. Хусусан, Ойбек Рустамов, Муҳаммаданас Ҳасанов, Иқболжон Маликжонов, Исломжон Абдуллаев, Аваз Маматхўжаев ва бошақа маҳоратли футболчиларни айнан жамоамизнинг янги бош мураббийи катта футболга олиб кирган. 

Мухсинжон Низомиддиновнинг мураббийлар штабидан Баҳром Ҳайдаров, Андрей Бакланов, Раҳматжон Иноғомов, Муҳиддин Абдувалиев жой олишди.