Қўқонда бугун аншлаг кўрамизми?

Унда "Нефтчи" - "Навбаҳор" қарама-қаршилигига гувоҳ бўламиз. Аввал хабар берганимиздек, мазкур учрашув Фарғонада эмас балки Қўқондаги "Марказий" стадионда кечади. Бўлажак баҳсга кенг жамоатчилик томонидан қизиқиш юқори. Ушбу жамоалар ўртасидаги ҳар бир тўқнашув уларнинг турнир жадвалида нечанчи ўринни эгаллаб туришидан қатъий назар, доимо кескин курашлар остида ўтиб келган.

Турнир тақвимига кўра бугун мезбонлик қиладиган "Нефтчи" ўтган турда сафарда "Пахтакор"га 0:1 ҳисобида имкониятни бой берганди. Фарғоналикларнинг бугунги рақиби "Навбаҳор" эса ўз майдонида "Бухоро"ни қабул қилиб, йирик 4:1 ҳисобида зафар қучган. Шу боис Ашурматов жамоасининг руҳий тайёргарлиги юқори.

Бугун ҳар иккала жамоада ҳам биттадан йўқотиш бор. Мезбонлардан Дилёрбек Ирматов ва "Навбаҳор" ҳимоячиси Алишер Саматов дисквалификация туфайли бугунги ўйинни ўтказиб юборади.  

Соат 17:15да старт оладиган баҳсга Фарғонадан ташқари наманганликларнинг ҳам ташриф буюриши кутилмоқда. Ҳозир соат 15:20. Стадионга мухлисларнинг ташрифи бошланиб кетди. Водий дербисида аншлаг кўрсак ажаб эмас.