"Қўқон-1912" ўз қароргоҳида шуғулланмоқда

Машғулотлар шаҳардаги академик лицейнинг сунъий қопламали стадионида ўтмоқда. 30 январга қадар шу ерда бўлиш режалаштирилган. Шу куни жамоа Фарғонага йўл олади ва иккинчи лига жамоаси "Динамо" билан синов-назорат учрашувида майдонга тушади.

Шу тариқа Тоҳир Кападзе жамоаси 2 февраль куни старт оладиган Фарғона Ҳоким Кубогида иштирок этиш учун тайёргарлик кўради. Олинган маълумотларга кўра, "Қўқон-1912" мазкур турнирдан сўнг яна Тошкентга бориб, ПФЛ Кубогида ҳам қатнашишни мақсад қилган.

Таркибдаги ўзгаришларга тўхталадиган бўлсак, кўрикда бўлган Нодир Ашурматовга жавоб бериб юборилган. Унинг ўрнига ўтган йили асосан захирада қолиб кетган Мунаввар Валихўжаев келган. Шунингдек жарохатдан кейин ҳимоячи Александр Критинин ҳам машғулотлар ўтказишни бошлаб юборган. Кўрикдан муваффақиятли ўтган Даврон Маматов билан шартнома имзоланган. Айтишларича "Қўқон-1912"нинг Тошкентдаги йиғини чоғида таркиибга "Бунёдкор"нинг иқтидорли футболчилари: Акрам Комилов ва Рустам Ашурматов қўшилади.