“Қизилқум” - “Сўғдиёна”: Мезбонларнинг мағлубиятсиз юриши бештага етадими?

Турнир жадвалининг қуйи ўринларида бораётган “Сўғдиёна” Навоийда “Қизилқум” меҳмони бўлади.

Айни пайтда “Қизилқум” 14 очко тўплаган ҳолда 9-ўринда боряпти. “Сўғдиёна” ҳисобида эса 7 очко мавжуд ва бу жамоа 13-ўринни эгаллаб турибди. Қизиғи шундаки, “Сўғдиёна” пастки ўринларда юрган бўлса-да, 14та гол уришнинг уддасидан чиққан. “Қизилқум” эса ҳозирча 11та тўп киритишга муваффақ бўлди.  

Жиззахликлар охирги тўрт учрашувнинг иккитасида ғалаба қозониб, иккитасида мағлуб бўлишди. Жамоа мана шу тўрт ўйиндан учтасини ўз майдонида ўтказиб, “Нефтчи”ни мағлуб этган бўлса, “Бунёдкор” ва “Пахтакор”га имкониятни бой берди. Сафарда эса “Андижон”ни ютиб қайтди. Мана энди Даврон Файзиев шогирдлари бугун ҳам сафарда тўп тепишади, аммо рақиб “Андижон”га қараганда анча кучли клуб. Шундай экан, “Қизилқум” майдонидан очко билан қайтиш осон бўлмайди.

Агар “Қизилқум” бугунги учрашувда ғалаба қозонса ёки дуранг қайд этса, уларнинг кетма-кет мағлубиятсиз серияси бештага етади. “Қизилқум” охирги марта 8-турда “Локомотив”га имкониятни бой берганди. Шундан бери тўрт учрашув ўтказган Юрий Лукин шогирдлари ҳали мағлуб бўлишмади: учта дуранг ва битта ғалаба. Биринчи давранинг охирида “Қизилқум” мағлубиятсиз сериясини бешта қилиб қўя оладими? Буни бугунги ўйин якунига етгач билиб оламиз.

Х.Холиқов.