ПСЖ Чемпионлар лигаси бир мавсумида 148,4 миллион ишлаб топди. Нега бунча кўп?

Узоқ кутилган совриндан ташқари, клуб каттагина мукофот пулларини қўлга киритишга муваффақ бўлди. Фақатгина финалдаги ғалаба парижликларга 10,5 миллион евро келтирди - ғалаба учун 6,5 ва Европа Суперкубогига йўлланма учун 4 миллион евро.

Football Meets Data портали маълумотига кўра, ПСЖнинг бир мавсумдаги умумий даромади 148,4 млн еврони ташкил этди ва бу Чемпионлар Лигаси учун рекорд кўрсаткичдир.

Турнирдаги иштироки учун барча жамоалар 18 миллион евродан олишди. Лига босқичида жамоа ҳар бир ғалаба учун 2,1 миллион евро, дуранг учун эса 700 минг евро ишлаб олди.  ПСЖ ҳисобида 4 ғалаба ва 1 дуранг бор. УЕФА кучли саккизликка кириш учун 2 миллион евро, гуруҳдан чиқиш учун (9-ўриндан 16-ўрингача) - 1 миллион евро тўлаган.

Плей-офф ўйинлари учун жамоалар қуйидагича мукофотланди:

1⁄8 финалга чиқиш - 11 миллион евро
Чорак финалга чиқиш - 12,5 миллион евро
1⁄2 финалга чиқиш - 15 миллион евро
Финалга чиқиш - 18,5 миллион евро

Соврин миқдорига телеҳуқуқлар ва олдинги иштроклар учун тўловлар ҳам киради: сўнгги беш ва ўн йиллик еврокубоклардаги иштроклар натижалари бўйича коэффициентлар ҳисоблаб чиқилган. ПСЖда бу тўловлар 44,7 млн евродан кўпроқни ташкил қилди.