Превью. Устоз ва шогирд тўқнашувида ким ғолиб бўлади?

"Сассуоло" — "Кальяри"

2019 йилда "Сассуоло" ҳали умуман гол ура олмади. А Серия ва Италия Кубогида ишончли ўйин кўрсатиб келаётган жамоалардан бири "Наполи"га (0:2) мағлуб бўлди. Чемпионатда эса "Интер" билан дуранг (0:0) ўйнади. Шундай экан, бугун дастлабки голларини киритишлари зарур. "Сассуоло"нинг бугунги рақибини ҳисобга олсак, бу ишни амалга оширишнинг айни вақти. Чунки "Кальяри" гол уришдан кўпроқ, тўпни ўтказиб юборишни одат қилган.

"Кальяри"га қарши ўтадиган учрашувдан "қора-яшиллар" унумли фойдаланиб, бу серияга барҳам беришлари мумкин. "Сассуоло" ўз майдонида бўлган сўнгги 7та ўйинда энг яхши натижаси ҳам дуранг билан якунланган. У фақат "Катанья" клуби устидан ғалаба қозонолган эди. Аммо бу Италия Кубоги доирасида бўлганди.

Бугун "Кальяри" ҳимоячиси Рагнар Клаван майдонга тушмайди. Эстониялик футболчи операция бўлди ва қачон ўйинларга қайтиши ҳали аниқ эмас. "Сассуоло" футболчиларидан эса ҳимоячи Марлон Сантос (жароҳат олган) ва ярим ҳимоячи Стефано Сенси (ўйиндан четлаштирилган) учрашувни ўтказиб юборади.

"Сампдория" — "Удинезе"

"Сампдория" Фабио Квальярелла билан Еврокубок учун курашмоқда. Олтинчи поғонага кўтарилиб олиш учун жамоага бор йўғи икки очко етишмаяпти. Агар мезбонлар ҳужумдаги ҳаракатчанликни сақлаб тура олсалар, у ҳолда ғалабага эришишлари мумкин. Ҳозирда "Сампдория" етакчиси Фабио Квальярелла қаторасига 10та ўйинда гол урган. Унинг натижалари ажойиб. Шундай экан, "Сампдория" мухлислари нимадан ҳавотирга тушишлари мумкин? Гастон Рамирес ва Жанлука Капрари майдонга тушмайди. Улар биргаликда 9та гол урди.  Квальярелла ёрдамчилари турли сабаблар туфайли баҳсни ўтказиб юборади. Бир муаммо, агар бугун жамоа етакчиси гол ура олмаса, унда ким рақиб дарвозасини ишғол этади?

"Удинезе"нинг ҳам улашиб ташлайдиган очколари йўқ, улар элитадан чиқиб кетишга жуда яқин турибди. Давиде Никола жамоасига ёрдам сифатида Стефано Окака-Чука, Марвин Зегелар ва Себастьян Де Майо келган: "Удинезе"да уларнинг бари ижарада тўп тепади. Стефано Окака-Чука дебют ўйинида гол уришга муваффақ бўлганди, лекин ўшанда жамоа ғолиб бўла олмаганди: уйда "Парма"га қарши баҳс (1:2).

Эслатиб ўтамиз, "Сампдория" уй учрашувларини ўтказувчи "Луижжи Феррарис" стадионида бўлган сўнгги 5та ўйинда "Удинезе" умуман ғалаба қозонолмаганди. Олтинчи уринишда наф чиқармикан?

“Милан” — “Наполи”

Бугунги куннинг энг муҳим учрашуви Милан шаҳрида бўлиб ўтади. Женнаро Гаттузо шогирдлари "Наполи"ни қабул қилади. Гонсало Игуаиннинг "Челси"га ўтиши борасидаги машмашалар ҳам ҳал бўлиб кетди. Аргентиналик ҳужумчи ярим йил ичида ҳам "Милан"даги ўз ўрини топа олмади. Унинг ўрини Кшиштоф Пёнтек эгаллади. "Россонери" келажагини айнан шу йигитда кўрмоқда. Поляк бугунги ўйинчилар рўйхатида бор ва бошланғич таркибда майдонга тушиши ҳам мумкин. У ва Лукас Пакета "Милан"ни юқори чўққиларга олиб чиқишига шубҳа йўқ.

Хўш, Женнаро Гаттузочи? Мураббий ҳозирча ўз лавозимида фаолиятини давом эттирмоқда, лекин кундан-кунга унга берилаётган саволлар сони ортиб бормоқда. Ёки раҳбарият мураббийни ўзгартириш ниятида эмасми?!

Айниқса, қаршингда афсона турган бўлса. Карло Анчелотти илк маротаба Италиянинг бошқа бир жамоаси устози сифатида "Милан"га қарши учрашувга ташриф буюради. Бугунги оқшом Карло ота учун ўзгача ўйин бўлиши турган гап. Неаполликлар "Ювентус"га етишлари амалда иложсиз, лекин тақибчилар билан орадаги фарқ ҳам етарли.

Биринчи давра учрашувида "Наполи" уйда "Милан" устидан 3:2 ҳисобида ғалаба қозонган эди. Бу сафар натижа қандай бўлар экан?

Нозима Зарипова тайёрлади