Пляж футболи: Ўзбекистон жаҳон рейтингида 62-ўринда қайд этилди

Пляж Футболи жамоалари рейтингини ҳисоб-китоб қилиб борадиган пляж футболи халқаро рейтинги дунё терма жамоаларининг сўнгги ой рейтингини эълон қилди. Унга кўра, пляж футболи бўйича Ўзбекистон терма жамоаси жаҳон рейтингида 62-ўринда бормоқда. Маълумот ўрнида май ойида пляж футболи халқаро рейтинги терма жамоаларнинг сўнгги 4 йилликдаги рейтинги эълон қилинган ва унда Ўзбекистон терма жамоаси 71-ўринда қайд этилган эди.

Июль ойи рейтингига кўра, Ўзбекистон терма жамоаси жаҳонда 62-ўринда, Осиё қитъаси жамоалари рейтингида эса 12-ўринда қайд этилган. Осиё жамоалари кучли учлигини Эрон (10), Япония (12) ва БАА (14) термалари банд этишган.

Маълумот учун, пляж футболи бўйича жаҳон рейтингини амалдаги жаҳон чемпиони - Россия терма жамоаси бошқариб турибди. Кучли учликни Бразилия ва Испания терма жамоалари тўлдирган.

Эслатиб ўтамиз, айни дамда Аҳад Юсупов бош мураббийлик қилаётган пляж футболи бўйича Ўзбекистон терма жамоаси шу йилнинг ноябрь ойида ўтказиладиган пляж спорт турлари бўйича Осиё Ўйинларида иштирок этади.