Ўзбекистон Кубоги. 1/4 финал жуфтликлари хусусида

Кун тартибидан иккита ўйин ўрин олган. "Қўқон-1912" ўз майдонида "Қизилқум"ни қабул қилса, "Пахтакор" Тошкент дербисида Локомотив билан куч синашади. Эртага яна иккита беллашув бўлиб ўтади. Эслатиб ўтамиз, Кубокнинг чорак финал учрашувлари битта ўйиндан иборат.

18 сентябрь. “Қўқон-1912” – “Қизилқум”
Мазкур икки жамоа Ўзбекистон Кубоги тарихида 1992 йил илк марта тўқнаш келган. Қизиқ томони, ўша йили ҳар икки жамоа бошқа номда иштирок этган. Қўқонликлар “Темирйўлчи”, навоийликлар эса “Прогресс” номи билан. 1/16 финалда кузатилган тўқнашувда қўқонликлар икки ўйин натижасига кўра ғалаба қозонишган. Зарафшон шаҳрида ўтган баҳсда ҳисоб очилмаган, Қўқонда эса 2:1 ҳисоби қайд этилган. Баҳром Ҳакимов бош мураббийлигида кўҳна шаҳар жамоаси финалга қадар етиб борган.

18 сентябрь. “Пахтакор” – “Локомотив”
Бу икки жамоа 2014 йил Ўзбекистон Кубоги ярим финалида ўзаро тўқнаш келган. "Темирйўлчилар" ўз майдонида 1:0 ҳисобида ғалаба қозонган. “Пахтакор” стадионидаги учрашув эса 2:2 ҳисобида якун топган.

19 сентябрь. АГМК - "Машъал"
2008 йил мазкур жамоалар айнан 1/4 босқичда тўқнаш келишган. Муборакда ўтган баҳсда мезбонлар 2:1 ҳисобида ғалаба қозонган. Олмалиқда эса Игорь Шквирин жамоаси худди шу ҳисобда зафар қучган. Қўшимча таймларда омад Олмалиқ шаҳри жамоасига кулиб боққан. Якуний ҳисоб – 3:1.

19 сентябрь. "Андижон" – "Бунёдкор"
Бу жамоаларнинг Ўзбекистон Кубоги баҳсларида илк тўқнашуви 2007 йил чорак финалда юз берган. “Қурувчи” номи остидаги "қалдирғочлар" ҳар икки ўйинда зафар қучишган. Тошкентда 3:0 ва Андижонда 1:0. 2010 йил бу жамоалар яна 1/4 финалда учрашишган. Тошкентда 4:1, Андижонда 3:1 ҳисобида пойтахтликлар ғалаба қозонган.

Бахтиёр Ширинов.