Ўзбекистон аёллар миллий терма жамоаси Америка Қўшма Штатларига йўл олмоқда

Аёллар футболи қўмитаси ташкил этилиб, истеъдодли футболчилар тарбиялаш, малакали мураббий, шифокор ва психолог мутахассисларни жалб этиш, уларни барча турдаги лицензияга бепул ўқитиш тизими йўлга қўйилди. Осиёда бу йўналишда етакчи мамлакат бўлмиш Япониядан мутахассислар жалб этилди. Терма жамоаларга хорижий йиғинлар ва кучли рақиблар билан ўртоқлик ўйинлари мунтазам ташкил этиб келинмоқда.

Хабарингиз бор, 9-12-апрель кунлари Ўзбекистон аёллар терма жамоаси АҚШда иккита ўртоқлик учрашуви ўтказади. ЎФА биринчи вице-президенти Равшан Эрматов сафар олдидан жамоа билан учрашди.

“Биринчи навбатда, Америка сафари олдидан Ассоциациямиз президенти Абдусалом Азизов номидан барчангизга омад ва оқ йўл тилаймиз! Яхши маълумки, АҚШ терма жамоаси амалдаги жаҳон чемпиони ҳисобланади ва тарихда энг кўп — 4 марта ушбу совринни қўлга киритган. Бу ўртоқлик ўйинлари бизнинг жамоа учун катта тажриба вазифасини ўтайди. Чунки олдинда жиддий мусобақалар бор ва биз олдимизга юқори мақсадлар қўйганмиз. Шу сабабли терма жамоа бошқарувига Мидори Ҳонда каби малакали мутахассис таклиф этилди. Кучли жамоалар билан учрашувлар эса жамоамиз савияси ошишига хизмат қилади”, деди Р.Эрматов.