Осиё мамлакатлари чемпионати: Баҳрайн

Баҳрайн чемпионати илк бор 1956 йил ўтказилган. Ҳозиргача "Муҳаррақ" 33, "Риффа" 11, "Баҳрайн" ва "Ал Аҳли" клублари 5 мартадан чемпионликни қўлга киритишган. Айни пайтда лигада 10 жамоа олтин медаллар учун кураш олиб боради. Баҳслар икки даврали тизимда ўтказилади. Сўнгги поғонани эгаллаган клуб биринчи лига ғолиби билан ўтиш баҳсида иштирок этади. Биринчи лигада эса 9 клуб иштирок этади. Мавсум куз - баҳор тизимида ташкил этилган.

Чемпионат учрашувлари камлиги сабаби Баҳрайнда иккита кубок мусобақаси борлиги билан боғлиқ. Баҳрайн ФА Кубогида 17-18 клуб икки гуруҳга бўлинган ҳолда қатнашади. Томонлар бир мартадан тўқнаш келади. Гуруҳларда юқори икки поғонани банд этган жамоалар ярим финалга йўл олишади.

Қирол Кубоги эса плей-офф босқичидан иборат турнир ҳисобланиб, унда Премьер ва биринчи лига клублари қуръага кўра кураш олиб боришади. Шу тариқа ҳар икки кубок мусобақасида жамоалар камида 10тадан учрашувда майдонга тушадилар.

Ўтган мавсумда "Муҳаррақ" клуби сафида ҳамюртимиз Шоҳрух Гадоев майдонга тушиб, бу мамлакатда тўп тепган биринчи ўзбек футболчисига айланганди.

Баҳрайн чемпионати. Мусобақа жадвали

Баҳрайннинг барча чемпионлари:
 
"Ал Муҳаррақ" - 33 марта
"Ал Риффа" - 11
"Баҳрайн", "Ал Аҳли" - 5
"Араби", "Ал Хала", "Ал Наср", "Ист Риффа", "Бусайтин", "Ал Хидд" - 1