Осиё Кубоги-2019. Карлуш Кейруш қуръада иштирок этмади

Хизмат сафари билан мен ҳам ҳар тўрт йилликнинг энг қизиқарли маросимини ёритиш мақсадида Тошкентдан Дубай томон йўл олдим. Ялбатта, яшириш керак эмас сафардан кўзланган асосий мақсадлардан бири Эрон терма жамоаси бош мураббийи Карлуш Кейрушдан интервью олиш эди.

Нега деганда Ўзбекистон миллий терма жамоасининг навбатдаги бош мураббийи Кейруш бўлиши ҳақида кўп гапириляпти. Мен эса бу борада португалиялик мураббийнинг ўзидан эшитмоқчи, ундан Жаҳон чемпионатидан кейинги режалари ҳақида сўрамоқчи эдим. Аммо Карлуш Кейруш қуръа маросимига ташриф буюрмади.

Сабабини суриштирганимда икки хил жавоб деб эшитдим. Биринчиси, айни пайтда Кейруш ва Эрон ФФ ўртасида қандайдир келишмовчилик юзага келган, шу боис мураббий ўша муаммони ҳал қилиш билан банд. Иккинчиси эса маросим араб давлатида ташкил этилгани учун сиёсий вазиятдан келиб чиқиб Эрон ўз мураббийини юборишни хоҳламаган. Майли, бу энди уларнинг муаммоси.

Умуман олганда, нафақат Кейруш балки Эрон ФФдан деярли ҳеч ким кўзга ташланмади. Қуръа тадбирига шунингдек, Австралия бош мураббийи Берт ван Марвейк ҳам келмади. Ундан ҳам интервью олиш ниятида эдим, чунки терма жамоамизни бошқарадиган номзодлар орасида ван Марвейк ҳам бор. Маълумки, голландиялик мураббий ЖЧ-2018дан сўнг терма жамоадан кетади ва унинг ўрнини маҳаллий мутахассис Грехэм Арнолд эгаллайди. Шундай экан, мураббийнинг нима учун келмагани тушунарли.

Хўш, Берт ван Марвейкнинг навбатдаги жамоаси ким бўлади? У Ўзбекистонга келиши мумкинми? Бу каби саволлар ҳозирча жавобсиз қолмоқда.

Х.Холиқов, Дубайдан махсус.