"Олмалиқ" - "Металлург" учрашувидан кейинги мураббийлар фикрлари

Игорь Шквирин, «Олмалиқ» бош мураббийи: «Бу икки жамоа ўртасидаги ўйинлар ҳар доим дербига мос шиддатли ва голларга бой тарзда ўтади. Бугун ҳам шунга гувоҳ бўлдик. Гол ўтказиб юборилгач, ўйинни ўзгартиришга ва ҳисобни ўз фойдамизга ўзгартира олдик. Умуман олганда бугун жамоамиз таркиб борасида жуда кўплаб йўқотишлар гирдобида қолганди. Достон Абдураҳмонов, Обид Жўрабоев, Мақсатмурот Шомуродовларда дисквалификация бўлса, Азамат Исроилов, Баҳром Юлдашев ва Тимур Кагировларда жароҳат бор эди. Кейинги ўйинларда таркиб тўлиқ бўлишидан умидвормиз».

Рустам Мирсодиқов, «Металлург» бош мураббийи: «Жамоамиз таркибида кўплаб ёш футболчилар тўп сурмоқда. Уларнинг айни пайтдаги ўйинидан қониқиш ҳосил қиляпман. Натижа ижобий бўлмаётганлигига ёшларда тажриба йўқлиги сабаб бўлмоқда. Бухорода ҳам, бу ерда ҳам ҳисобни биз очсак-да, ғалабани ушлаб қола олмадик. Жамоамиз олдига ҳар доим чиройли ўйин кўрсатиб, бекободлик мухлисларни хурсанд қилиш вазифаси юкланган. Кейинги ўйинларда яхши ўйин намойиш этиб, ижобий натижаларга эришишга ҳаракат қиламиз».