Олимпия терма жамоамиз эртага Вьетнамга йўл олади

Бахтиёр Ашурматов бошқарувидаги жамоа у ерда Вьетнам олимпиячиларига қарши майдонга тушади. Аслида Вьетнамга боришдан мақсад иккита ўртоқлик учрашуви ўтказиб қайтиш эди. Бироқ кейинчалик битта ўйин бўлиб ўтиши маълум бўлди ва бу учрашув 14 март куни ўтказилади.

7 март куни олимпия терма жамоамиз "Жар" стадионининг қўшимча майдонида "Олмалиқ"қа қарши назорат баҳсида майдонга тушиб, 0:1 ҳисобида мағлуб бўлди. Вьетнамга қарши баҳс Бангладешда бўлиб ўтадиган Осиё чемпионатига саралаш босқичидан олдин тайёргарлик вазифасини ўтаб беради.

Эслатиб ўтамиз, саралашдаги рақибларимиз Бангладеш, Сурия ва Ҳиндистон бўлиб, гуруҳда биринчи ўринни қўлга киритган жамоа келаси йил Қатарда ўтказиладиган Осиё чемпионатига йўлланма олади. Ҳозирча Вьетнамга йўл оладиган якуний таркиб борасида тўлиқ маълумотга эга эмасмиз, бу хақда ЎФФда таркибни кутиб қоламиз.