Олий лига. 19-тур. “Навбаҳор” сафардаги ғалабасиз серияга барҳам берадими?

16:00. “Сўғдиёна” - “Навбаҳор”

Турнир жадвалида 13-ўринда бораётган “Сўғдиёна” ўз майдонида “Навбаҳор”ни қабул қилади. Кеча бўлиб ўтган ҳар иккала жамоанинг ўринбосарлари баҳсида “Навбаҳор” ёшлари 3:0 ҳисобида ғалаба қозонишди. Хўш, бугунги ўйинда ҳам “Навбаҳор”нинг асосий таркиби ўзини кўрсата оладими ёки “Сўғдиёна” ўз майдонида рақибга имкон қолдирмайдими?

Иккинчи давра бошланганидан бери “Сўғдиёна” фақат бир марта ғалаба қозонди. Яъни, Даврон Файзиев шогирдлари сафарда “Динамо”ни енгиб қайтишди. Жамоа ўз майдонида “Олмалиқ” билан дуранг ўйнади ва қолган уч беллашувда ютқазиб қўйди.

“Навбаҳор” эса бешта ўйиндан иккитасида зафар қучди. Жамоа ҳар иккала ғалабани ўз майдонида қўлга киритди. Сафардаги учта баҳсда наманганликлар фақат мағлуб бўлишди. Бугун эса жамоа сафарда тўртинчи ўйинини ўтказади ва бунда “Навбаҳор”га яна осон бўлмаса керак. Негаки жамоа бугунги ўйинини бош мураббийсиз ўтказади. Чунки Бахтиёр Ашурматов терма жамоамиз билан Осиё ўйинларига жўнаб кетган.

Бу ҳам ўзига яраша йўқотиш ҳисобланади албатта. Тўғри, жамоада Мустафо Байрамов билан Зоҳид Нурматов каби ёрдамчилар бор, лекин барибир замонавий футболда бош мураббийнинг ўрни катта. Олий лигадан тушиб кетиши мумкин бўлган “Сўғдиёна” учун бу ўйин жудаям муҳим. Ўз навбатида “Навбаҳор” ҳам қараб турмаса керак.

Х.Холиқов.