ОФК семинари бошланди

Қитъамизнинг ҳар иккала нуфузли турнирида иштирок этувчи 80га яқин клуб вакиллари иштирок этаётган семинар Куала-Лумпурдаги муҳташам “Hilton” отелида ташкил этилган.

Семинар бошланишидан олдин клублар вакиллари ОФК масъуллари рўйхатидан ўтишди ва иштирокчилар учун аввалдан тайёрлаб қўйилган махсус бейжикларни қабул қилиб олишди.

Маҳаллий вақт билан соат 9:00да ОФК бош котиби Алекс Сусай сўз олиб, мусобақа олдидан клубларга омад тилади ва семинарни тантанали равишда очиб берди. Шундан сўнг, ОФК масъуллари минбарга чиқишиб, аввалдан режалаштирилган семинар маърузаларини ўқиб эшиттиришни бошладилар.

Маҳаллий вақт билан 15:00да (Тошкентда 12:00 бўлади) қура ташлаш маросими бошланади. Даставвал ОФК кубоги иштирокчилари ўз рақибларини билиб олишса, соат 16:00да Чемпионлар лигаси гуруҳ босқичи учун қуръа ташланади.