ЎФФ учун янги лого қанчалик зарур?

Бошимга янги шапка, эгнимга янги кўйлак кийганим билан мен ўша-ўша Диёр бўлиб қолавераман. Фикрларим, принципларим, қарашларим ўзгариб қолмайди, демоқчиман. Мадомики шундай экан, ЎФФ ҳам янги логотип билан ўзгариб қолмаслигига ишонаман. Бизда муаммолар етарлича, уларни ҳал қилмай туриб бренд ҳақида бош қотиришга эртадир балки.

Сўнгги бор Туриннинг “Ювентус” клуби ўз логотипини ўзгартирди. Қандай қилиб? Янги раҳбарият келгани ёки бошқа нарса учун эмас. Италияда “Юве” бир неча йиллар давомида шаклланиб келди ва ўз йўлини топиб олди. Қолган клублар давлат қарамоғидаги стадионларга рози бўлиб юрганида, А серия клублари орасидан биринчи бўлиб “кекса сеньора” ўзига стадион қурди. Чемпионатда кетма-кет беш йил чемпионликни қўлга киритди, Чемпионлар Лигасида финалгача борди. Мамлакатда унинг бренди энг яхши бўлиб шаклланиб келаётган бир вақтда раҳбарият логотип ҳақида бош қотира бошлади.

Бизда Олий Лига ўрнига Супер Лига вужудга келиш арафасида турибди. Биринчи Лига эса Про Лига номини олади. Марҳамат, бу лигалар учун янги логолар керак, албатта. Тўғри, ЎФФ яқинда ЎФАга айланади, яъни, Ўзбекистон футбол ассоциацияси. Ташкилот ичида энди аёллар футболи ҳам, футзал ҳам бор. Осон эмас уни бошқариш, тартибга солиш. Бу борада раҳбариятга катта сабр тилайман. Ҳозир эса таклиф қилинган логоларни амалдагиси билан солиштириб, бир фикрга кела олмадим. Ҳар ҳолда ЎФФни Осиёда амалдаги белгиси билан анча таниб қолишганди.

“Атлетико” логони қандай ўзгартирганини эслаб кўринг. Ўша-ўша брендини замон талаблари асосида такомиллаштирди. Яъни, улар Америка кашф қилиб ўтирмай, мавжуд камчиликларни бартараф этиш ҳақида кўпроқ ўйлади. Бизда эса хаёлга келиб қолган суратлар чизилгандек. Агар биз фақатгина битта компания билан эмас, бир нечтаси билан ишласак, рақобат вужудга келади. Компаниялар ҳар бир рангни нега ишлатганидан тортиб, алоҳида белгилар нималарни билдиришига қадар изоҳлаб беради.

P.S. Мақола аслида бошқачароқ эди. ЎФФ логоси қолаверсин, дегандим. Кейин ҳамкасбларимдан бири ЎФФ ЎФАга ўзгармоқчи, яъни, ассоциация бўлмоқчи, деган фикрни берди. Агар шундай бўлса, нега овозга қўйилган вариантларда ҳали ҳам ЎФФ турганини тушунмадим. Бир донагина ЎФА варианти бор. Демак, ўша вариант ғолиб чиқди деб ўйлайверишим керакми? Унда сўровнома кимга керак эди?