ОЧЛ. Сўнгги турдаги ғалаба "Локомотив"ни плей-оффга олиб чиқади, "Насаф"ни эса йўқ

Қаршида "Насаф" Эроннинг "Персеполис" клуби билан 0:0 ҳисобида дуранг ўйнади. "Локомотив" эса кеча БААда "Ал Ваҳда"ни тор-мор этиб қайтди.

Сўнгги тур олдидан клубларимизнинг имкониятлари ҳақида тўхталиб ўтамиз.

Афсуски ўз уйида ғалаба қозона олмаган "Насаф"нинг гуруҳда қолиб кетиши аниқ бўлди. Рўзиқул Бердиев шогирдлари ҳисобида айни пайтда 7 очко бор. Сўнгги турда жамоамиз "Ал Васл"ни ҳар қандай ҳисобда мағлуб этса ҳам кейинги босқчига чиқа олмайди. Сабаби "Насаф" ғалаба қозонса ва Эрон клуби охирги турда "Ал Садд"га ютқазса "Персеполис"га етиб олади.

Осиё чемпионлар лигаси регламентига кўра очколар тенг келиб қолганда биринчи навбатда ўзаро ўйинларга эътибор қилинади. "Насаф" "Персеполис"га сафарда ютқазган (0:3) ва ўз майдонида дуранг ўйнади (0:0). Шу сабабли "аждарлар" учун 6-тур учрашуви расмиятчиликка айланди. Лекин бу билан "Насаф"га натижа муҳим эмас дейиш ноўрин. Сабаби клуб Ўзбекистон шарафини ҳимоя қилмоқда ва ҳар қандай очко навбатдаги йиллар учун юртимиз клубларига квота ажратишига таъсир қилади. Бундан ташқари жамоа ўз мухлислари учун ҳам ғалаба қозониши керак. Шундай экан "Насаф"дан сўнгги турда ҳам ғалаба кутамиз.

"Локомотив" эса ажойиб ғалабадан сўнг кейинги босқичга чиқиш имкониятни яхшилаб олди. Бунда Қатарнинг "Ал Дуҳаил" клуби ҳам "Локо"га "ёрдам" бериб юборди. Сабаби ўтган турдаёқ кейинги босқичга чиқиб бўлган "Ал Дуҳаил" кеча Эронда "Зоб Оҳан"ни мағлуб этди.

Шу тариқа, охирги турдан олдин "Локомотив" ва "Зоб Оҳан" ҳисобида бир хил 6тадан очко бор. Бу дегани "Локомотив" 17 апрель куни ўз майдонида "Зоб Оҳан"ни исталган ҳисоб билан мағлуб этса кейинги босқичга чиқади. Дуранг эса Эрон клубини қониқтиради.

Қизиғи, "Насаф" 10 очко билан ҳам гуруҳдан чиқа олмайди, "Локомотив"га эса 9 очко гуруҳдан чиқиши учун етарли бўлади.

Охирги турда Ўзбекистоннинг иккала клубига омад тилаймиз.