"Нефтчи" - "Навбаҳор": Мураббийларнинг ўзаро "дуэли"

Учрашувнинг дастлабки бўлимининг охирларида футболчилар ўртасида кичик низолар келиб чиқди. Учрашув дерби мақомида бўлганлиги боис, бундай вазиятларни "одатдагидек" деб баҳолаш мумкин. Авваллари бундан ҳам бадтар манзараларга гувоҳ бўлгандик.

Ўйиннинг кульминацион нуқтаси биринчи бўлим якунангач кузатилди. Футболчилар майдонни тарк этаётган чоғда "Навбаҳор" бош мураббийи Бахтиёр Ашурматов ҳамда "Нефтчи" мураббийи Сергей Лебедовлар ўртасида қандайдир келишмовчилик келиб чиқди шекилли, иккала мутахассис ҳам асабий тарзда субатлашишди, айримларнинг айтишича, даҳанаки жанг муштлашувгача ҳам бориши мумкин эди. Шу пайтда уларнинг орасига "Навбаҳор" мураббийи Зоҳид Нурматов қўшилди. Фарғоналик танишларнинг маълум қилишига қараганда, Нурматов Лебедовга қўл кўтарган. Шу жойда уларни ажратиб қўйишибди. Учрашувни меҳмонлар секторидан кузатганимиз боис, ушбу вазиятлар бизга айтарли кўринмади.

Учрашув назоратчиси Сайфиддин Эрматовнинг кўрсатмасига биноан уччала мураббий ҳам ўйинни мухлислар қаторидан кузатишга мажбур бўлишди. Ушбу масалани албатта ПФЛ кўриб чиқади. Ҳакамлар бригадаси бу борадаги фикр ва хулосаларини федерацияга етказишади. Якунда эса, барча мураббийлар жазоланиши мумкин. Аввалроқ Ашурматовга ПФЛ томонидан жазо белгиланганди.

Бу галги дербида мураббийлар "ўзларини" кўрсатишди. "Навбаҳор" мураббийларининг йўқлиги эса учрашув натижасига таъсир кўрсатди, дейиш мумкин. Чунки, иккинчи бўлимда "лочинлар" дастлабкисида кўрсатган ўйининг ярмини ҳам кўрсата олмади.