"Нефтчи" дарвозабони Фарруҳ Турдалиев: “Янгиликлар кўп. Кам гапириб, иш билан исботламоқчимиз”

Ўз олдига Суперлигага чиқишни мақсад қилиб қўйган фарғоналиклар йиғиннинг илк кунларида жисмони ҳолатни яхшилашга қаратилган машқларга урғу беришди. Биз бу борада жамоанинг ишончли дарвозабони Фарруҳ Турдалиевнинг фикрлари билан қизиқдик

“20 декабрь куни йиғилдик. Таътилдан сўнг асосан жисмоний имкониятларимизни кўриб олиш мақсадида, шунга доир машқларни бажаряпмиз. Жамоада ички муҳит аъло даражада, ҳамма бир бири билан илиқ муносабатда. Молиявий томондан ҳам айни пайтда ҳолат барқарор дея оламан. Умуман олганда янгиликлар кўп. Биз кам гапириб, иш билан исботламоқчимиз.

Барча футболчилар жамоа билан янги мавсумга тайёргарлик кўряпти. Ҳозирча ҳеч ким тарк этганича йўқ. Мақсадимиз “Нефтчи”ни Суперлигага қайтариш. Биз бунинг учун қўлимиздан келган барча ишни қиламиз. Агарда бир оила бўлиб бирлашсак, ўйлайманки олдимизга қўйилган вазифани бажара оламиз.

Жамоамиз бу сафар Суперлигага чиқиш учун жиддий ёндашади. Ўтган мавсумдаги хатоларимиздан тўғри хулоса чиқардик. Насиб қилса мухлислар “Нефтчи”ни кучлилар сафида албатта кўришади”, - деди Фарруҳ Турдалиев.

Абдулазиз Искандаров суҳбатлашди