МТЖ: “Жар”да навбатдаги машғулот (ФОТО)

Одатдагидек бир ярим соат давом этган машғулот анча қизиқ кечди.  Футболчилар маза қилиб шуғулланишди деса бўлади. Бу сафар терма жамоамизда сафида иккита дарвозабон машғулот ўтказди: Игнатий Нестеров билан Элдор Суюнов. Никита Рибкин эса олий лигадан ўрин олган “Олмалиқ” - “Пахтакор” баҳсида иштирок этиш учун вақтинча клуб ихтиёрига жўнаб кетди.



Қолган ўйинчилар эса кечаги машғулотда қатнашишди. Одатдагидек чигалёзди машқлари билан бошланган машғулот майдоннинг ярим қисмида футбол ўйнаш билан давом эттирилди. Лекин бунда йигитлар ҳар доимгидек футбол ўйнашмади. Балки, майдон чизиғи ташқарисида ҳар бир таркиб учун иккитадан футболчи турди ва уларнинг иши рақибни чалғитиш орқали ўз жамоаларига ёрдам бериш бўлди. Бунда асосий вазифани ҳимоячилар бажаришди.



Ушбу машғулот якунига етгач, футболчилар жарима тўпларини амалга ошириш устида ишлашди. Шуни айтиш керак, нима учундир аксарият футболчилармиз жарима зарбаларини моҳирона тепа олишмади. Бу ҳол ҳатто жарима тўпини яхши тепадиган футболчиларда ҳам кузатилди. Ўйинда бўлгани каби кўп зарбалар дарвозадан анча баландга йўналтирилди. Бу борада яна ва яна кўпроқ ишлашга тўғри келади шекилли. Машғулот якунига етганидан кейин ҳам Сервер Жепаров билан Сардор Рашидов жарима зарбасини беришда давом этишди. Бунда дарвозада Игнатий Нестеров турди.



Бугун ўйинолди охирги машғулот бўлади. Эртага эса бизни Янги Зеландияга қарши ўртоқлик учрашуви кутиб турибди. Ўйин соат 19:00да “Пахтакор” стадионида бошланади.