Миржалол Қосимов: “Бунёдкор”ни вақтинчалик Волков бошқариб туради”

Бу ҳақдаги гап-сўзлар анча олдин урчиганди ва фақат бугунга келиб бу маълумот ўз тасдиғини топди. Терма жамоамиз келаси йили январь ойида Осиё Кубоги-2015да иштирок этади.

Табиийки, энди бор эътибор қитъа чемпионатига тайёргарликка қаратилади. Олдинда ўртоқлик учрашувлари бор. Миржалол Қўшоқович шу ўйинлар орқали жамоани Осиё Кубогига тайёрлайди. Маълумотларга кўра, Қосимов шу йил кузда Жанубий Кореянинг Инчеон шаҳрида бўлиб ўтадиган Осиё ўйинларига ҳам терма жамоамизни олиб боради. Бу жамоа асосан 1991 йилда туғилган футболчилардан таркиб топган бўлади. Албатта, бу янгилик ҳам ижобий ҳолат. Бу жамоадан айрим ўйинчилар миллий терма жамоага ҳам таклиф этилиши мумкин.  

Бугунги янгиликдан сўнг Миржалол Қосимов билан боғланиб, бир нечта саволлар билан мурожаат қилдик.

- “Бунёдкор” жамоасидаги фаолиятимни тўхтатдим ва энди бор эътиборимни миллий терма жамоага қаратаман. Фурсатдан фойдаланиб, мен билан бирга шунча йил давомида ишлаган футболчилар, клуб раҳбарияти ва жамоанинг барча ишчи-ҳодимларига ўз миннатдорчилигимни билдираман. Бугунги машғулот олдидан катта аҳил жамоа билан хайрлашдим ва уларга мавсумнинг қолган ўйинларида омад ёр бўлишини тиладим. Машғулот олдидан сўнгги кўрсатмаларимни бердим.

- “Бунёдкор”га ким бош мураббий этиб тайинланади?
- Ҳозирча аниқ бир маълумотга эга эмасман. Бу масалани клуб раҳбарияти ҳал қилади. Унгача Александр Волков вақтинчалик бош мураббий вазифасини бажариб туради. Қолаверса, ёрдамчиларим - Ҳикмат Эргашев ва Мурод Отажонов ҳам унга яқиндан ёрдам беришади.

- Эндиги режалар қандай?
- Эртага “Олмалиқ” - “Андижон” жамоалари ўртасидаги учрашувни томоша қилиш учун Олмалиққа бораман. Якшанба куни Наманганда “Навбаҳор”-“Насаф” жамоалари ўртасидаги ўйинни бевосита стадионда кузатаман. Энди турнинг турли ўйинларини кузатиб, терма жамоага муносиб номзодларни кўриб бораман.
  
Камолиддин АЛИМОВ суҳбатлашди