Нидерландия дарвозабони Мика Спигт: "Гуруҳда иркит ўрдакча бўлишни истамаймиз"

"Август ойи охирида Марокашдаги назорат ўйинларидан сўнг, мураббий тўртта дарвозабонни бир жойга чақириб, улардан учтасини танлади. Улар орасида мен ҳам бор эдим. Жаҳон чемпионатида иштирок этиш улкан тажриба орттиришимизга сабаб бўлади. 

Мен эндигина ўн тўққиз ёшни қарши олдим ва кўпчиликдан анча ёшман. Вазиятга реал қараш керак, Мануэль Куйк термма жамоанинг асосий дарвозабони, мен эса захира ўйинчисиман. Бироқ майдонга тушиш эҳтимоли пайдо бўлса, ажойиб иш бўларди. Агарда бу воқеа содир бўлмаса ҳам, жамоадошларимни қўллаб-қувватлаб, қўлимдан келганича ёрдам бераман.

Мезбон Ўзбекистонга қарши ўйин 12 минг томошабинга мўлжалланган ўйингоҳда ўтказилади. Бизга айтишларича, деярли барча чипталар сотиб бўлинган. Демак, стадион мухлислар билан тўлади. Ҳеч қачон бунчалик кўп ишқибозлар қаршисида ўйнамаганман. Ҳатто Қозоғистонда энг кўпи уч минг киши қаршисида тўп тепганман. 

Тўғри, гуруҳимиздаги барча давлатлар жаҳон рейтингида юқори поғоналарда жойлашган. Бироқ Финляндия ва Озарбайжонга қарши ўйинларда кучли давлатларни ҳам мағлуб этишимиз мумкинлигини исботладик. Гуруҳда иркит ўрдакча (кулгига қоладиган ва заиф кўриладиган маъносида — таҳририят) бўлишни истамаймиз. Биз бир жамоа бўлиб, кейинги босқичга йўл олишимиз мумкинлигини исботлашни истаймиз", деди 19 ёшли дарвозабон.

Эслатиб ўтамиз, Нидерландия терма жамоаси "А" гуруҳидаги илк учрашувини 14 сентябрь куни Ўзбекистонга қарши ўтказади.

Оқил Абдубарноев тайёрлади.