Месси футболни забт этди. Аргентиналикнинг саккизинчи "Олтин тўп" сари йўли (мутолаа учун)

"Интер Майами" форварди Лионель Месси фаолиятидаги саккизинчи "Олтин тўп"ини ютди. Ҳеч ким бунчалик кўп нуфузли индивидуал совринни қўлга киритмаган. Аргентиналикнинг ягона ҳақиқий рақиби "Манчестер Сити" ҳужумчиси Эрлинг Холанд бўлди. Бири жаҳон чемпиони бўлди, бошқаси эса требл ютди. Ғолибни аниқлаш қийин бўлди, аммо барибир Мессини афзал кўришди. Аргентиналикнинг саккизинчи, балки сўнгги "Олтин тўп"ига қадар бўлган йўлни эслаймиз.

Лео учун ўтган мавсумдаги асосий турнир жаҳон чемпионати бўлди. Месси ЖЧ-2022да "Олтин бутса" соҳиби Килиан Мбаппедан атиги битта камроқ, аниқроғи 7та тўп киритди. У турнирни энг кўп ассист (3) ва муҳим паслар (21) билан якунлади, шунингдек энг кўп дарвоза томон аниқ зарба (13) берди.

ПСЖ ва "Барселона" собиқ ҳужумчиси шунингдек жаҳон чемпионатлари тарихида гуруҳ босқичидан тортиб турнинг ҳар бир босқичида голлар урган илк ўйинчи бўлди. ЖЧ-2022нинг энг яхши ўйинчисини аниқлаш вақти келди ва ғолиб фақат битта ўйинчи бўлиши мумкин эди. Месси эндиликда ушбу мукофотни икки бор қўлга киритган ягона футболчи ҳисобланади. У шунингдек 2014 йилда жаҳон чемпионатида кўрсатган ўйинлари учун мукофотланганди.

Месси жами бешта жаҳон чемпионатида ўйнади. Лео ҳозирги футболчилар ўртасида мундиалнинг энг самарадор ўйинчиси ҳисобланади – унинг ҳисобида 13та гол ва 8та ассист бор. У шунингдек турнирдаги ўйинлар сони (26) бўйича мақтаниши мумкин, у Германия терма жамоаси афсонаси Лотар Маттеусдан битта кўп ўйин ўтказган. Фақатгина 3 ўйинчи жаҳон чемпионатларида аргентиналикдан кўпроқ гол уришган: Мирослав Клозе (16), Роналдо (15) ва Герд Мюллер (14).

Аргентина ҳақли равишда жаҳон чемпионати финалига чиқди ва унда Франция билан куч синашди, фаворит сифатида эса илк бўлимда яхши ўйин кўрсатган ҳолда умидларни оқлади. Месси ва Ди Мариянинг голлари "альбиселесте"ни танаффусга қадар 2:0 ҳисобида билан олдинда боришини таъминлади, бу эса Дидье Дешамни ўйин тизимини ўзгартиришга ундади. Франция иккинчи бўлимда умуман бошқача ўйнади ва Килиан Мбаппенинг 2 дақиқадаги икки голи эвазига ўйинни қўшимча вақтларгача олиб борди. Шунга қарамасдан, Месси қатъиятни сақлаб қолди ва 108-дақиқада гол урган ҳолда Аргентинани олдинга олиб чиқди, аммо Мбаппе 10 дақиқадан сўнг ҳисобни тенглаштирди.

Месси пенальтилар сериясида биринчи бўлиб зарба берди ва Уго Льориснинг ёнидан тўпни дарвозага киритган ҳолда хотиржамликни акс эттирди. Сардорнинг хотиржамлиги жамоадаги шерикларига ҳам ўтди. Якунда, "альбиселесте" пенальтилар сериясида 4:2 ҳисобида ғалаба қозонди, Гонсало Монтиэль эса ҳал қилувчи голни урди. Айрим ўйинчилар ғалабани нишонлаш учун Монтиэль томон йўл олишди, аммо кўпчилик марказий айланада тиззаси билан кўз ёшлар билан йиқилган Леони қучоқлашга интилди. ЖЧ-2022 Мессининг турнири бўлди.

Лео жаҳон чемпионатига ПСЖ таркибида тайёрланди. "Барселона"дан кетганидан сўнг аргентиналикнинг "Парк де Пренс"даги илк мавсуми муваффақиятли ўтмади, аммо у 2022/23 йилги мавсумнинг илк ярмида яна энг яхши формасини йиғиб олди. Аргентиналик Лига 1да 16та гол ва 16та ассист қайд этди. Кристоф Гальтье Мессига ПСЖ ҳужумида эркин роль берди ва бу тезда ўз фойдасини берди. Лео охир-оқибат Килиан Мбаппе ва Неймар билан ҳамоҳанг ўйнай бошлади. Парижликлар бир муддат Чемпионлар лигаси учун ҳақиқий даъвогарлар сифатида кўринишди.

Афсуски, мавсум ўртасидаги танаффус ПСЖнинг жадаллигини пасайтирди. Месси жаҳон чемпионатидан сўнг қўшимча таътил олди, қайтганда эса унчалик яхши кўринмади. Сўнгра парижликлар "Бавария"га қарши Чемпионлар лигаси 1/8 финал жавоб ўйини олдидан навбатдаги жиддий жароҳатдан сўнг Неймарни йўқотишди. Гальтье жамоаси умумий икки ўйинда 0:3 ҳисобида мағлуб бўлди, мухлислар эса жамоанинг Европа ареналаридаги муваффақиятсизлигида бразилиялик ва Мессини айблашди.

ПСЖ Лига 1да чемпионлик титулини ҳимоя қила олган бўлса ҳам мавсум муваффақиятсиз деб тан олинди. Леонинг шартномани узайтирмагани ҳайратланарли эмас, сабаби у француз пойтахтидаги майдон ва унинг ташқариси тўлиқ ўзини топмади.

Аммо, факт шундаки, Месси ўзининг ПСЖдаги сўнгги мавсумини барча мусобақаларда 41та ўйинда 21та гол ва 20та ассист билан якунлади. Фақатгина Муҳаммад Салоҳ, Мбаппе ва Холанд кўпроқ гол уришди. 36 ёшли аргентиналик элитада қолмоқда. Ҳаттоки Европадан "Интер Майами"га кутилмаган ташриф ҳам вазиятни ўзгартирмади: у МЛС жамоасидаги дастлабки 11та ўйинида 11та гол урди.

Мессини қувиб ўтиш ва "Олтин тўп"ни олишга имконияти бўлган ягона шахс Холанд эди. Дортмунднинг "Боруссия" клуби собиқ ҳужумчиси 52 млн фунт эвазига "Манчестер Сити" учун муваффақиятли харид бўлди. У 36та гол урган ҳолда битта мавсумдаги голлар сони бўйича Премьер-лига рекордини янгилади. Норвегиялик шунингдек Чемпионлар лигасида 12та, Англия кубогида 3та ва Лига кубогида 1та тўп киритди.

Пеп Гвардиола жамоаси Холанд келгунига қадар Англия лигасида ҳукмрон куч эди, аммо у буни янги даражага олиб чиқди ва узоқ кутилган Чемпионлар лигаси совринини ютишга ёрдам берди. Норвегиялик айтилаётган барча мақтовларга арзийди. Аммо, Мессидан фарқли равишда у энг муҳим ўйинларда ўз жамоаси учун муҳим фактор бўлмади. Холанд ўтган мавсумнинг сўнгги саккизта ўйинида фақатгина 1та гол урди. У ЧЛнинг ярим финалида ҳам, финалида ҳам, Англия кубогининг ярим финал ва финалида гол ура олмади.

"Манчестер Сити" форварди ўтган мавсум ўйин давомида ўртача жами 24,8 бор тўпга тегинди ва 11,7та узатмани амалга оширди. "Шаҳарликлар" одатда ўйин темпини Холандсиз ҳам назорат қилишади. Месси эса аксинча, ўтган мавсум Аргентина терма жамоаси ва ПСЖнинг асосий плеймейкери бўлганди. У тезда ақлли узатмалари билан мудофаани бузиши мумкин ва майдоннинг учинчи қисмида доим тўғри қарорларни қабул қилади.

Месси – ўйинни бир ўзи ютиши мумкин бўлган такрорланмас футболчи. Холанд – биринчи даражали тўпурар, аммо унинг ўйинлари ҳар томонлама яхшиланишни талаб қилади. "Сити"нинг Эрлингнинг бир ўзи ўйиннинг боришини ўзгартириб юборишига ишониши қийин масала. Норвегиялик билан вазиятларни голларга айлантириш учун шартнома имзоланди ва у буни бошқалардан кўра яхшироқ қилмоқда. Аммо, уни ҳали ҳам Месси билан бир қаторга қўйиб бўлмайди. Лео тўғри маънода Аргентинани Жаҳон чемпиони совринига олиб келди ва фақатгина шунинг ўзи уни саккизинчи "Олтин тўп" учун муносиб қилади.

Goal материаллари асосида Footballhd.ru'да тайёрланди. Алишер Остонов таржимаси