#Matchday: Манчестерда АПЛ ва А Серия пешқадамлари тўқнашуви, "Тоттенхэм" Мадридда имтиҳон топширади (превью)

Сабаби аниқ, Европа чемпионлар лигасининг навбатдаги тур ўйинларига старт берилади.
Футбол шайдолари сешанба ҳамда чоршанба кунларини бошқача иштиёқ ва интиқлик билан кутишади.
Европанинг энг нуфузли турнири - ЕЧЛ 3-учрашувлари ҳам эшик қоқмоқда.

Тўртта гуруҳда бугун 3-тур беллашувлари бўлиб ўтади.
"E" гуруҳи: "Спартак" - "Севилья", "Марибор" - "Ливерпуль"
"F" гуруҳи: "Манчестер Сити" - "Наполи", "Фейеноорд" - "Шахтер"
"G" гуруҳи: "Монако" - "Бешикташ", "РБ Лейпциг" - "Порту"
"H" гуруҳи: "Реал" - "Тоттенхэм", АПОЕЛ - "Боруссия" Дортмунд

Дастлаб "E" квартетидаги ҳолатга эътибор қаратамиз.
Гуруҳ пешқадами "Севилья" бугун Москвада иккита ўйиндан буён дуранг қайд этаётган "Спартак" қаршилигига дуч келишади. Каррера шогирдлари кетма-кет иккита дурангдан кейин энди ғалаба қозониш пайти келганини яхши тушуниб туришибди. "Севилья" эса Москвадан очкосиз қайтадиган бўлса, унда пешқадамликни бошқага топшириб қўйиши муқаррар. Шу боисдан ҳам испанияликлар пешқадамликни мустаҳкамлаш мақсадида ғалабани кўзлашлари аниқ.
"Спартак" эса биргина ғалаба билан гуруҳдаги ҳолатини яхши томонга ўзгартириш имкониятига эга.
Шу жиҳатдан олиб қарайдиган бўлсак, ўйин анча ҳужумкор ва муросасиз ўтиши аниқ.

Гуруҳнинг нариги баҳси Словенияда ўтказилади. Биринчи турда ўз уйида "Спартак"дан бир очко олган "Марибор"ни бу сафар янада жиддийроқ рақиб - "Ливерпуль" кутмоқда.
"Марибор" ва "Ливерпуль" жамоаларини ўртасидаги фарқ - 1 очкони ташкил қилади. Аммо словенияликлар ушбу номдор рақибларига етарлича қаршилик қилишларига ишониш қийин. Таркибдаги футболчиларнинг даражаси, жамоаларнинг савияси ўртасидаги фарқ албатта бу ерда ўз сўзини айтиши аниқ. Бироқ "Марибор" Европа чемпионлар лигасида шунчаки номига иштирок этиш учун ўйнамаслигини исботлашга астойдил ҳаракат қилади.
Юрген Клопп эса иккита ўйиндаги дурангдан кейин бу сафар ҳам ғалаба қозонмаса, кескин танқидлар остида қолиб кетишини ва гуруҳдаги ҳолатни қийинлаштириб қўйишини тушуниб турибди.
Шу боисдан ҳам бу баҳс "Ливерпуль" учун юқори аҳамият касб этади. Зеро, бу турда ҳам уч очко қўлга киритилмаса, жамоа осон деб тахмин қилинган гуруҳнинг биринчи даврасини ғалабасиз якунлашига тўғри келади. Бу эса "Ливерпуль" каби гранд жамоа учун уятли бўлади.

Нафақат куннинг, балки турнинг энг марказий ўйинларидан бири "F" гуруҳида кечиши аниқ.
"Квартет" пешқадами "Манчестер Сити" А Серия пешқадами "Наполи"ни меҳмон қилади.
Гвардиола ва Сарри тўқнашувига айланадиган ушбу баҳсга бўлган қизиқиш анча юқори. "Сити" пешқадамликни янада мустаҳкамлаш учун ҳаракат қилса, "Наполи" уларга етиб олиш учун бугун бор кучини сарфлаши аниқ.
Ўртадаги 3 очколик фарқни йўққа чиқаришни, "Сити"ни жорий мавсумда биринчилардан бўлиб мағлубиятга учратишни "Наполи" уддалай оладими, деган саволга жавоб оламиз.

Англия премьер лигаси ва А Серия етакчиларининг ўзаро ўйинлари Европа чемпионлар лигаси 3-турини безаб бериши аниқ. Ҳар иккала жамоа мураббийлари ҳужумкор футбол тарафдори. Ҳужумкорликни хуш кўрадиган жамоалар ўртасидаги баҳс эса мухлислар кутган совғани тақдим этади.
Гвардиола ҳам, Сарри ҳам ўз жамоаларини 4-3-3 тактик схемада ўйнатмоқда. Бир хил услубни, бир хил тактик схемани қўллайдиган икки мутахассис тўқнашувида кимнинг қўли баланд келади?

Таркибдаги номлар, танлов имконияти кўплиги ва ижрочилар маҳоратида бобида "Сити"нинг устунлигини қайд этмасликнинг иложи йўқ. Қўшимчасига ўйин Манчестерда бўлади. Бу эса албатта "Сити"нинг имкониятларини ошириши табиий. Аммо "Наполи" қайси рақибга қандай услубни қўллашни биладиган малакали ва кучли мураббийга эга. Шунингдек, жамоа футболчилари ном жиҳатидан "Сити"га бироз ютқазиши мумкин, аммо ўйин борасида улар исталган жамоага рақобатни тақдим этишга қодир.

Жамоа бекорга А Серияда пешқадам бўлиб тургани йўқ.
Жамоаларнинг еврокубоклардаги тажрибаси ҳақида гапирадиган бўлсак, бу борада тенгликнинг гувоҳи бўламиз.
Ҳар иккала жамоа ҳар қанча кучли ва номдор бўлмасин, аммо ҳозирча ЕЧЛда улар ҳақиқий топ клубга айланишгани йўқ.

Гуруҳнинг иккинчи ўйини Голландиядаги "де Куип" стадионида бўлади.
Унда гуруҳ аутсайдери "Фейеноорд" Украинанинг "Шахтёр" жамоасини қабул қилади. Бу ўйинда "Фейеноорд" ЕЧЛдаги ўзининг илк очкосини қўлга киритиш учун курашса, "Шахтёр" турнир жадвалида иккинчи поғонага кўтарилиб олиш учун ҳаракат қилади. Агарда "Шахтёр" меҳмонда "Фейеноорд"ни енгишни уддасидан чиқса, унда Манчестердаги ўйинда етакчиларнинг бири очко йўқотиши натижасида "кончилар" уларга етиб олишлари мумкин.

"G" гуруҳи аутсайдери "Монако" пешқадам "Бешиктош" билан куч синашади. Ўтган мавсум Европа чемпионлар лигасида яхшигина тўполон кўтарган "монегасклар" учун жорий мавсум анча муваффақиятсиз бошланди. Таркибдаги етакчиларнинг жамоадан кетиши натижасида жамоа бирмунча кучсизланди. Аксинча, кучли футболчиларни ўз таркибига қўшиб олган "Бешиктош" эса анча кучайишга эришди ва бугунги кунда "G" гуруҳида якка пешқадамлик қилмоқда.

"Монако" дастлабки икки ўйиндаги муваффақиятсизликдан кейин "Бешиктош"га қандай кураш таклиф этади? Жамоа гуруҳдан чиқиш имкониятларини сақлаб қолиши учу бугун пешқадамни мағлубиятга учратиши лозим. Акс ҳолда Леонардо Жардим шогирдлари ўтган йилги кўтарилишдан кейин анча пастга қулашларига тўғри келади.
"Бешиктош" жамоаси эса бугун Франциядан уч очко билан қайтадиган бўлса, унда улар масалани деярли ҳал этишади.
Пешқадам ва аутсайдер ўртасидаги ушбу баҳс ўзига хос финалга айланади.

Гуруҳнинг иккинчи учрашуви Германияда бўлади. Турнир жадвалининг ўрталиғидаги "Лейпциг" ҳамда "Порту" жамоалари иккинчи йўлланма учун астойдил курашишлари аниқ. Бу жамоаларнинг ўзаро тўқнашуви эса кўп нарсани ҳал қилиши мумкин.
"Ред Булл Арена"даги ўйин гуруҳ босқичининг биринчи даврасини ким иккинчи поғонада якунлашига ойдинлик киритиб беради.

"H" гуруҳида анча қизиқ ҳолат кузатилмоқда. Бу "квартет"да иккита жамоа 6 очкодан тўплаган ҳолда қўшпешқадамлик қилаётган бўлса, қолган иккита жамоа ҳали очко жамғармаган.
Мадридда қўшпешқадам бўлиб турган "Реал" ҳамда "Тоттенхэм" жамоалари ўзаро беллашишади. Бу ўйинда ким гуруҳнинг якка ҳокимига айланиши ҳал этилади.
"Сантьяго Бернабеу"даги баҳсда мезбонларнинг имкониятлари юқори. "Реал" гарчи ички чемпионатда юқори савияда ўйнамаётган бўлсада, еврокубокларда қандай ўйнашни биладиган жамоа.

"Тоттенхэм" эса бу борада бугунги рақиби қаршисида кичкина жамоадек таассурот уйғотиши мумкин.
Аммо Почеттино "Тоттенхэм" билан катта аренага чинакамига кирмоқчи эканлигини яширмаяпти. Бугунги ўйин "Тоттенхэм"нинг катта ўйинларга қанчалик тайёр эканлигига ойдинлик киритиб беради. Маурицио Почеттино бугун "Реал"га қарши учрашувда ўзига хос имтиҳон топширади, десак муболаға бўлмайди.

Нариги баҳсда эса ҳозирча очкосиз қолаётган АПОЕЛ ва "Боруссия" Дортмунд илк очколар учун кураш олиб боришади.
Бу ўйинда иккинчи давра олдидан қайси жамоа гуруҳдан чиқиш учун курашни давом эттириши маълум бўлади.
Бу тўқнашув фаворити кимлиги аниқ. Аммо Дортмунд жамоаси ўтган иккита баҳсда ҳам ўйин борасида жуда кучли таассурот қолдиришганига қарамасдан, якунда мағлубиятга учрашганди. Петер Бошш ҳозирча еврокубокларда ўзининг янги жамоаси билан илк ғалабасини қўлга киритишда қийинчиликка дуч келмоқда.

ЕЧЛ, 3-тур.

"E" гуруҳи
"Марибор" - "Ливерпуль"
"Марибор": Ханданович; Милец, Райчевич, Шулер/Биллонг, Вилер; Кабха, Врховец; Пихлер (Байде), Ахмеди, Бохар; Таварес
Ўйнамайди: Шме (жароҳат)
Сўроқ остида: Шулер (жароҳат)

"Ливерпуль": Кариус; Александер-Арнолд, Матип, Ловрен, Морено; Окслейд-Чемберлен, Хендерсон, Милнер; Салах, Коутиньо, Старридж.
Ўйнамайди: Мане (жароҳат), Лаллана (жароҳат), Клайн (жароҳат), Мастерсон (дисквалификация)

"Спартак" - "Севилья"
"Спартак": Селихов; Ещенко, Джикия, Таски, Боккетти, Комбаров; Фернандо, Глушаков, Самедов, Промес; Луис Адриано
Ўйнамайди: Ребров (жароҳат), Тигиев (жароҳат), Зобнин (жароҳат), Тимофеев (жароҳат), Ананидзе (жароҳат), Зе Луиш (жароҳат)

"Севилья": Серхио Рико; Меркадо, Кьер, Лангле, Эскудеро; Васкес, Пизарро, Банега; Корреа, Бен-Йеддер, Нолито
Ўйнамайди: Пареха (жароҳат), Каррису (жароҳат)
Сўроқ остида: Кьер (жароҳат), Н'Зонзи (жароҳат)

"F" гуруҳи
"Манчестер Сити" - "Наполи"
"Манчестер Сити": Эдерсон, Уокер, Стоунз, Отаменди, Делф; Фернандиньо, де Брейне, Сильва; Стерлинг, Жезус, Сане.
Ўйнамайди: Компани (жароҳат), Менди (жароҳат)

"Наполи": Рейна; Хюсай, Альбиоль, Кулибали, Гулям; Аллан, Диавара, Гамшик; Кальехон, Мертенс, Инсинье
Ўйнамайди: Милик (жароҳат)

"Фейеноорд" - "Шахтер"
"Фейеноорд": Джонс; Амрабат, ван Беек, Сен-Жюст, Хапс; Эль-Ахмади, Тоорнстра, Вилена; Бергхейс, Боэтьюс, Ларссон.
Ўйнамайди: Боттегин (жароҳат), ван дер Хейден (жароҳат), Тапия (жароҳат)
Сўроқ остида: Крамер (жароҳат)

"Шахтер": Пятов; Бутко, Ордец, Ракицкий, Исмаили; Фред, Степаненко; Марлос, Тайсон, Бернард; Феррейра.
Ўйнамайди: Кривцов (жароҳат), Малишев (жароҳат), Дентиньо, Срна.

"G" гуруҳи
"Монако" - "Бешикташ"
"Монако": Субашич; Туре, Глик, Жемерсон, Сидибе; Лопеш, Моутинью, Фабиньо, Лемар; Фалькао, Бальде
Ўйнамайди: Йоветич (жароҳат)

"Бешиктош": Фабри; Медель, Пепе, Д. Тошич, Джанер Эркин; Огузхан Эзьякуп, Хатчинсон; Куарежма, Талиска, Бабел; Дженк Тосун
Ўйнамайди: Атинч Нукан (жароҳат), Гекхан Тере (жароҳат), Оркан Чинар (жароҳат)

"РБ Лейпциг" - "Порту"
"РБ Лейпциг": Гулач; Бернардо, Орбан, Упамекано, Хальстенберг; Демме, Кейта; Забицер, Форсберг; Поульсен, Огюстен
Сўроқ остида: Клостерманн (жароҳат), Вернер (жароҳат)

"Порту": Касильяс; Макси Перейра, Фелипе, Маркано, Алекс Теллес; Данилу; Эррера, Сержиу Оливейра; Марега, Абубакар, Брахими
Ўйнамайди: Диогу Лейте (дисквалификация), Соарес (жароҳат)

"H" гуруҳи
"Реал" - "Тоттенхэм"
"Реал": К. Навас; Начо, Варан, Рамос, Марсело; Модрич, Каземиро, Кроос, Иско; Бензема, Роналду
Ўйнамайди: Бейл (жароҳат), Ковачич (жароҳат), Карвахаль (жароҳат)

"Тоттенхэм": Льорис; Алдервейрелд, Санчес, Вертонген; Орье, Уинкс, Дайер, Триппьер; Эриксен, Сон Хын Мин; Кейн
Ўйнамайди: Алли (дисквалификация), Н'Куду (жароҳат), Дембеле (жароҳат), Ваньяма (жароҳат)
Сўроқ остида: Дэвис (жароҳат), Роуз (жароҳат)

АПОЕЛ - "Боруссия" Дортмунд
АПОЕЛ: Ватерман; Вурос, Руэда, Меркис, Лаго; Захид, Винисиус, Нуну Мораиш, Алонефтис; Шоллои; де Камарго.
Ўйнамайди: Бертольо (жароҳат), Эфрем (жароҳат), Карлао (жароҳат)
Сўроқ остида: Миланов (жароҳат)

"Боруссия": Бюрки; Загаду, Бартра, Папастатопулос, Тольян, Кастро, Нури Шахин; Ярмоленко, Кагава, Пулишич; Обамеянг
Ўйнамайди: Пищек (жароҳат), Дурм (жароҳат), Рафаэл Геррейру (жароҳат), Шюррле (жароҳат)
Сўроқ остида: Шмельцер (жароҳат)

P.S. Учрашувлар Тошкент вақти билан соат 23:45да бошланади.