Максим Шацких "Пахтакор"даги 3 мавсумлик фаолиятини изоҳлади

"Пахтакор" бош мураббийи лавозимидаги фаолиятимни якунлар эканман, мана шу 2,5 йил давомида бирга ишлаган барчага раҳмат айтмоқчиман!

Ҳурматли клубимиз Президенти Жаҳонгир Ортиқхўжаевга билдирилган ишонч ва сабр-тоқат, қўллаб-қувватлаш ва донолиги учун самимий миннатдорман!

Клуб офисида меҳнат қилган барчага, жамоанинг барча ходимларига ва штабимизга, майдонда барча кучларини қолдирган футболчиларга, жамоани охиригача қўллаб-қувватлаган ва ишонган барчага ташаккур айтаман.

Ушбу мавсумларнинг турли даврларида мени шахсан қўллаб-қувватлаган барчага чин қалбимдан ташаккур билдираман. Бизга ишонмаган барчага алоҳида раҳмат, сизлар бизни янада кучлироқ бўлишимизга ёрдам бердингиз. Биз икки марта чемпион бўлиб, ажойиб йўлни босиб ўтдик. Албатта, ҳамма нарса биз истагандек бўлмади, лекин ҳаёт шуниси билан янада қизиқроқ бўлди!

Футболчиларимизга хорижнинг нуфузли клубларидан талаб борлигидан хурсандман. Демак, биз тўғри йўналишдамиз.

Аббосбек Файзуллаев (ЦСКА), Азиз Турғунбоев (Сивасспор), Муҳаммадали Ўринбоев (Брентфорд), Достон Турсунов (Истиқлол Ҳузистон), Мэтью Стинворден (Терренгану), Пшемислав Банашак (Гурник), Ҳожимат Эркинов (Ал Ваҳда), Икром Алибоев (Канвон), Сардор Рашидов (Ум Салал) ва бошқалар.

Бир йил олдин клуб раҳбарияти белгилаган ривожланиш йўналишига мувофиқ катта эътибор қаратган ёш футболчиларимиз катта ўсишга эришишди. Мен бундан хурсандман. Бу жараён осон кечмади, натижа яхши бўлмаган бўлса ҳам, келажак учун мустаҳкам пойдевор ярата олдик. Бунинг тасдиғи сифатида мавсумнинг энг яхши ёш ўйинчиси деб тан олинган Муҳаммадрасул Абдумажидовни мисол келтиришимиз мумкин.

Мен ишонч билан ёш жамоани янги мураббийга топшираман ва клуб тузилмасини ривожлантиришга эътибор қаратаман. Майдондан ташқарисида ҳам эътибор қаратишимиз керак бўлган жабҳалар бор. Олдинда улкан режалар ва кўплаб ишлар кутмоқда", - дея изоҳ қолдирди Максим Шацких ўзининг Instagram саҳифасида.

Эслатиб ўтамиз, Максим Шацких клуб директорлар кенгаши аъзоси ва Жаҳонгир Ортиқхўжаев маслаҳатчиси сифатида клубдаги фаолиятини давом эттиради.