"Локомотив" кундалиги: Абу Дабидаги еттинчи кун. Машғулотлар жиддий давом этяпти

Жамоа аъзолари икки маҳал машғулот ўтказишди ва ҳар икки машғулот футбол майдонида кечди. Дарвозабонларни одатдагидек Петр Гизимчук шуғуллантирган бўлса, майдондаги ўйинчилар билан Андрей Фёдоров (бош мураббий), Андрей Микляев (катта мураббий) ва Александр Шатских (жисмоний тайёргарлик бўйича мураббий) машғулот олиб боришди.

Ва албатта мураббийлар штабига жамоа шифокори Аброр Пирриев, массажчилар Гурген Исраелян, Абдураҳим Саримсоқов, жамоа маъмурлари Бахтиёр Исмоилов билан Улуғбек Усмонхўжаев, клуб матбуот котиби Хайрулла Холиқов, шунингдек видео тасвирчи Равшан Акбаров яқиндан ёрдам бериб келишяпти.

Олдинда жамоани 11 январь куни дастлабки ўртоқлик учрашуви кутяпти. Шу куни "Локо" Шотландиянинг энг номдор клубларидан бири "Глазго Рейнжерс"га қарши назорат баҳсини ўтказади. Машғулотлар фақат шу ўйинга қаратилган деб бўлмайди, балки жамоа бутун бир янги мавсумга тайёргарлик кўрмоқда. Дастлабки вазифа эса 21 январь куни Тошкентда бўлиб ўтадиган ОЧЛ плей-офф босқичида Тожикистоннинг "Истиқлол" клубини мағлуб этиш ҳисобланади.