Жаҳонгир Меҳмонов: “Иккинчи даврадаги илк ўйинимни ўтказаман”

Ушбу турда Фарғонанинг “Нефтчи” жамоаси ўз уйида Тошкентнинг “Пахтакор” жамоасини қабул қилади. Ушбу учрашув олдидан мезбонлар жамоаси футболчиси Жаҳонгир Меҳмонов ўз фикрларини билдирди.

“Ушбу учрашувга яхши тайёргарлик кўрдик. “Пахтакор” яхши шаклланган жамоа. Мана шу ҳолатни инобатга олган ҳолда машғулотларда кўпроқ тер тўкдик. Айни дамда “шерлар” яхши спорт формада. Чемпионатимизда бироз танаффус юзага келганидан унумли фойдаландик. Машғулотларда кўпроқ ҳимоя ва ҳужум чизиғимизни кучайтириш бўйича ишлар олиб бордик. “Пахтакор” устидан ғалаба қозониш учун бор кучимиз билан ҳаракат қиламиз. Рақибларимизни керакли даражада ўргандик, деб ўйлайман. Бугунги учрашувда бизга Аббос Маҳсталиев ва Муҳсин Убайдуллаев ёрдам бера олмайди.

Тўғри, бундан аввалги турда сафарда “Обод” жамоасига имкониятни бой бергандик. Бу-футбол! Кимдир ғалаба қозонади яна кимдир мағлуб бўлади. Ғалаба қозонсак барча хурсанд бўлади, мағлуб бўлсак барча футболчилар тушкун кайфиятга тушиб қолади. Мағлуб бўлишни ҳеч бир футболчи истамайди. Бугун фақат ғалаба қозониш учун майдонга чиқамиз. Бугунги рақибларимиз иккинчи даврада анча мазмунли ўйин кўрсатишмоқда. Лекин бизга ҳам очко керак. Ҳозир барча жамоалар фақат ғалаба қозониш учун майдонга тушмоқда. Олган жароҳатимдан сўнг, бугун иккинчи даврадаги илк ўйинимни ўтказаман”, - дейди “Нефтчи” жамоаси футболчиси Жаҳонгир Меҳмонов.

Жаҳонгир Сотволдиев