Ихтиёр Тошпўлатов: “Янги мавсумда асосий таркибдан жой олишга интиламан”

Буни футболчи билан ўзаро суҳбат давомида ҳам билиб олдик. 

Янги мавсумни қайси жамоада ўтказиши ҳақида

- Худо хоҳласа, янги мавсумни “Металлург”да бошлайман. “Турон”да ижара асосида ўйнаб қайтдим ва насиб қилса, янги мавсумда бекободликлар сафида асосий таркибда ўйнамоқчиман. Рақобат юқори эканини биламан. Шу боис машғулотларда кўпроқ меҳнат қилиб, асосий таркибга муносиб эканимни исботламоқчиман. 

“Турон”даги фаолияти борасида

- “Турон”даги фаолиятимдан қониқиш ҳосил қилганим йўқ. Негаки, биз Суперлигада қолиш вазифасини уддалай олмадик. Агар вазифани бажарганимизда, балки бирмунча қониқиш ҳосил қилган бўлардим. Яхши ўйнаган бўлсак-да, омадсизликлар туфайли керакли натижаларга эриша олганимиз йўқ. Бир нечта клублардан таклифлар бўлди, бироқ мен “Металлург”да қоламан. Чунки жамоа билан амалда шартномам бор. 

“Металлург”нинг янги бош мураббийи тўғрисида

- Жамоамиз янги бош мураббийи билан ҳали юзма-юз бўлиб гаплаша олганим йўқ. Лекин бу мураббийнинг ўтган мавсумнинг охиридаги иш фаолиятини четдан туриб кузатдим. Ишонаманки, хорижлик мураббий жамоага фойда келтира олади. 

Фаолияти борасида

- Янги мавсумдан умидим катта. Охирги мавсумлардаги фаолиятимдан бироз қониқмадим. Бунинг ўзга яараша сабаблари бор, аммо ҳоўир буларни ошкор қилишдан фойда йўқ.

Легионер бўлиши хусусида

- Албатта, келажакда легионер сифатида тўп тепиш имкониятим бўлишига ишонаман. Бу кун келишини кутаман.