Иван Нагаев ва Саламат Қутибоев бу йилги мавсумни “Бухоро”да ўтказади

Бош мураббий Бахтиёр Ашурматов маҳаллий ёшлар билан бир қаторда айрим чизиқларга тажрибали футболчиларни ҳам жалб этмоқда.

Хусусан ўтган мавсум “Бухоро” шарафини ҳимоя қилган Саламат Қутибоев жорий йил ҳам жамоадаги фаолиятини давом эттирадиган бўлди. У жамо сафида тўп суриб меҳнаткаш ва плеймейкер вазифасини муносиб тарзда бажариб келмоқда. Тажрибали ярим ҳимоячига Суперлиганинг бир нечта клубларидан чақирув бўлишига қарамай, Қуттибоев “Бухоро”да қолишга қарор қилди ва шу тариқа клуб билан тузган шартномасини яна бир йилга узайтирди.

Шунингдек мураббийлар штаби ҳужум чизиғини кучайтириш мақсадида Иван Нагаевни жамоага қайтаришга қарор қилди. Ушбу тезкор ҳужумчи  2017 йилги мавсумида жамоа сафида 29та учрашувда майдонга тушиб,10та гол уришга муваффак бўлган ва маҳаллий мухлисларнинг ёқимтойига айланиб улгурганди. Шу боис Нагаев яна собиқ жамоасига қайтарилди.

Яқинда жарохатидан тўлиқ фориғ бўлган футболчи “Бухоро”нинг умумий гуруҳи билан машғулотларга киришди. Айтиш керакки, Иван Нагаев ҳам “Бухоро” жамоаси билан расман шартнома имзолади.

Бу билан бухороликлар селекция ишларини ҳозирча якунлангани йўқ. Бош мураббий Бахтиёр Ашурматов ҳозирда яна айрим футболчилар билан музокара олиб бормоқда. Яқинда орада улар билан ҳам расман келишувга эришилса, бу ҳақда батафсил маълумот берамиз.