Ислом Тўхтахўжаев: "Бугун Италия, Франция ва Эквадор ғалаба қозонади"

Марказий ўйинлардан бири Франция ва Швейцария терма жамоалари ўртасида бўлиб ўтади. Бу икки жамоа дастлабки турда мос равишда Гондурас (3:0) ҳамда Эквадор (2:1) терма жамоаларини мағлуб этишганди. Шу боис ҳам бугунги ўйиннинг қизиқарли ўтиши кутиляпти. Айнан мана шу учрашув гуруҳ ғолиби номини ҳам аниқлаб беради. Шунингдек, бугун Италия  Коста-Рика ҳамда Эквадор  Гондурас жуфтликлари ҳам ўзаро муносабатларига ойдинлик киритиб олишади.
Биз бугунги ўйинлар олдидан Ўзбекистон миллий терма жамоаси ҳамда Тошкентнинг Локомотив клуби ҳимоячиси Ислом Тўхтахўжаевнинг фикрлари билан қизиқдик.

- Ислом, ЖЧ-2014 ўйинларини кўриб боряпсизми?
- Очиғини айтсам, ҳамма ўйинларни ҳам кўра олмаяпман. Марказий учрашувларни имкон қадар қолдирмасликка ҳаракат қиляпман.

- Испания ва Англия терма жамоаларининг мундиалдаги омадсиз иштироки ҳақида қандай фикрдасиз?
- Ҳамиша ҳам бир текис ўйин намойиш этиб бўлмайди. Менимча, Бразилиядаги мундиалда бу икки терма жамоага омад етишмади.

- Бугун оқшом ўтказиладиган ўйинлардан нималар кутяпсиз?
- Ўйлашимча, бугун Италия,Франция ва Эквадор терма жамоалари рақибларини мағлуб этишади.

- Ҳисобларни тахмин қила оласизми?
- ... (бироз ўйлаб) Эквадор  Гондурас - 2:0, Франция  Швейцария - 2:1,  Италия  Коста-Рика - 2:0.

- Сизнингча, қайси жамоа чемпион бўлади?
- Одатда тахминларим ўзини оқлаб туради. Ўз уйида ўйнаётгани учун Бразилия терма жамоасининг имкониятларини юқорироқ баҳолайман. Германия ва Голландия ҳам ўз иштирокини чакки бошламади.

Камолиддин АЛИМОВ суҳбатлашди