Ислом Тўхтахўжаев: "Барча ўйинда камбэк амалга ошириб бўлмайди. Чемпионлик учун 4-5 жамоа кураш олиб боради"

"Бугун жуда қийин ўйин ўтказдик. "Бунёдкор" ҳам яхши ўйин намойиш этди. Бу – футбол, шундай экан, бундай натижа учраб туради. Кейинги ўйинга яхшироқ тайёргарлик кўрамиз деган умиддаман. 

Барча ўйинда ҳам камбэк амалга ошириб бўлмайди. Чунки ҳар бир рақиб турлича ўйин таклиф қилади. Лекин муаммони кўпроқ ўзимиздан қидирганимиз маъқул. Бугун ўз ўйинимиз ўхшамади, айниқса, биринчи бўлимда. Мураббий ҳам танаффусда фақат ғалаба қозонишимиз кераклигини таъкидлади. Унинг ҳам таймдан кўнгли тўлмагани олдинги чизиқда ўзгаришлар қилганидан маълум эди. Беллашувни таҳлил қилиб, хатолар устида ишлаймиз.

Ҳисобда ортда бораётган пайтимиз олдинроққа чиқиб ўйнашга мажбур эдик. Ютқазаётган ҳар қандай жамоа бу ишни қилиши табиий ҳол. Шу боис, рақиб ҳужумчилари офсайдда бир неча бор дарвозабонимиз билан бирга-бир вазиятга чиқиб борди. 

Мавсум сўнгига қадар юқори темпни ушлаб қолишга ва чемпионлик учун курашишга ҳаракат қиламиз. Чемпионлик учун 4-5 жамоа кураш олиб боради. "Бунёдкор", "Насаф", "Пахтакор", "Нефтчи" сингари жамоалар юқори мақсадни кўзламоқда", деди 35 ёшли футболчи.