Игорь Сергеев: "Кўпроқ гол уришдан бошқа барча вазифаларни бажардик"

- Ўйин ҳақида фикрингиз...

- Яхши ўйин бўлди. Имкониятлардан фойдалана олмаганимиз сабабли етарлича гол ура олмадик. Аслида, йигитлар яхши ўйнашди, мураббийнинг кўрсатмаларини бажаришга ҳаракат қилишди. Менимча, кўпроқ гол уришдан бошқа барча вазифаларни бажардик.

- Сўнгги йилларда хорижда тўп тепдингиз. Ушбу давр тажриба орттиришингизга ёрдам бердими?

- Албатта, яхши ёки ёмон бўлсин, ҳар қандай тажриба – ўз номи билан тажриба, агар уни тўғри идрок этсангиз, ҳар қандай ҳолатда ҳам ривожланасиз. Шунинг учун мен аниқ айтишим мумкин: чет эл футболини кузатиш ва унга мослашиш жуда катта фойда беради.

- Охирги ўйинларда бош билан ўйнашда мастер-класс кўрсатяпсиз. Жаҳон футболида бош билан ўйнашда биринчи навбатда Зинедин Зидан ёдга олинади...

- (Кулади) Худога шукурки, гол уряпман. Биласизми, мен шундай ўйлайман: хоҳ бош билан бўлсин, хоҳ оёқ билан, фарқи йўқ, асосийси гол бўляпти. Мен учун энг муҳими гол уриш, бош биланми, оёқ биланми ёки кўкрак билан – буни фарқи йўқ, асосийси тўп дарвозага кирса бўлгани.