"FIFA.uz" ғолибининг Европадаги саргузаштлари

Келинг, иштирокчимизнинг саргузаштларини ўзидан эшитамиз.

18 октябрь куни соат 18:35 Тошкент - Милан йўналиши бўйича Италиянинг Милан шаҳрига учдик. Олти ярим соатлик парвоздан сўнг маҳаллий вақт билан соат 22:00да Миланга етиб бордик. 19 октябрь эрталабдан шаҳарни айландик. “Модалар шаҳри” деб аталадиган Милан ажойиб, гўзал шаҳар экан. Иккинчи жаҳон уруши вақтида Италия ва Аргентина орасида яхши муносабатлар ўрнатилган деб эшитдим. Шунинг учун бўлса керак, шаҳарда Аргентина ресторанлари кўп. Энг асосий шопинг-маркази ҳам Буэнос-Айрос кўчасида жойлашган. Бу кўчада дунёга машҳур брендларнинг дўконлари бор. Кечга яқин Миланнинг энг машҳур, туристлар бориб кўрадиган Дуомага бордик, жуда тарихий маскан экан . Ўша ердан метрода тўғри муҳташам “Сан-Сиро” стадиони томон йўл олдик. Милан вақти билан соат 20:45да “Интер” ва “Наполи” ўртасидаги баҳс бошланиши керак эди. Метрога тушгач ўйин атрофидаги муҳитга қизиқдик. Барча-барча стадионга кетаётган эди. Одамларнинг кўпчилиги “Интер” футболкасини кийиб олган, бўйнида шарф... Бир гуруҳ словакиялик мухлислар ўз тилларида қандайдир шиорларни айтиб кетишаётган эди. Тушунимизча улар “Наполи” ва Марек Гамшикнинг мухлислари экан. Ҳеч ким, айниқса “Интер” фанатлари уларга қаршилик қилмагани ҳайрон қолдирди. Барча ўз жамоасини қўллаш учун биргаликда стадионга йўл олди. Стадионга яқин бекатда метродиги 99 фоиз одам футболга келаётганини тушундим. Метродан чиқиб “Сан-Сиро”гача 2 километр пиёда бордик. Метродан чиқиш билан узоқдан стадион кўриниб туради. Бу ерга яқинлашганда барча жойда кўчма-вагончиклар ҳар хил егулик-ичимликлар сотилмоқда. 30тадан ошиқ дўконлар футболка, шарф байроқлар сотилаётганди. “Интер”дан ташқари “Наполи” клуби шарфлари ҳам бор. Фақат "Милан" шарфларига кўзимиз тушмади, сабаби бугун “Интер” ўйнаши керак эди. Барча жой “кўк-қора” рангга бурканган, бошқа пайт эса бу ҳолат “қизил-қора”га айланар экан. Кассада чипталар секторига қараб 30 дан 170 еврогача. 45 евродан чипта олдик. Эътиборлиси, чиптачи қиз бизга паспортсиз чипта берилмаслигини айтди. Яхшики ҳужжатларимиз ёнимизда эди, чипталарга исм-шарф ёзилар экан. Стадионга кираётганда билет билан бирга паспортни кўрсатиб кирар экансиз. Бу фақат бизга тегишли эмас, италияликлар ҳам ID паспортларини кўрсатиб киришаётганди. Бу дегани ҳеч ким бошқанинг чиптасига киролмас экан. Чипта сотиш қора бозори йўқ, қўлда чипта сотиш йўқ.

• Менда "зўр-зўр", сизларда-чи ))
  

Сиғими 78.000га яқин бўлган стадионга камида 40-45 минг мухлис йиғилди. Стадионга эса гап йўқ, тўғри сал эскирган. Масалан, киравериш зиналари, ҳожатхоналари ремонт талаб бўлиб қолган. Шунга қарамай, у беш юлдузли стадионлар тоифасига киради. УЕФА 2015/16 ЕЧЛ финалини айнан “Сан-Сиро” топширганини барча билса керак. Ҳамма жойда бўлгани каби меҳмонларга алоҳида секторлар ажратилган. Шу куни “Наполи”ни қўллаш учун 3000дан ошиқ фанатлари келган экан улар дарвоза орқасидаги секторнинг 3-ярусида, яъни тепада жойлашишди. Янаям қизиғи, стадионда биронта ҳам полиция ходими йўқ. Ҳаттоки меҳмонлар секторида ҳам фақат сариқ жилет кийган волонтёрлар юрибди, улар ҳам унча кўп эмас. Шуни билдимки, улар учун футбол бу катта байрам кўпчилик оиласи билан келган. “Интер” тиффозилари бошқа дарвоза орқасида ўтиришди. 10.000дан ошиқ фанатлар бор эди. Ўйин бошланишига 30 дақиқа қолганида қўшиқ, шиорлар айтишни бошлашди, футболчилар енгил машғулотдан кейин кийиниш хонасига қайтиб кириб кетишганда, сухандон таркибларни таништирди. Сухандон “Интер” ўйинчиларининг исмини айтса, фанатлар бир овоздан фамилиясини айтишди. Майдон марказига ўша ўйинчининг расми туширилган баннерларни ёш болалар кўтариб туришди: ажойиб муҳит. Битта ўйинга шунча тайёргарлик ана шоу, ўйин бошланиши билан “Интер” фанатлари тепа ярусдан стадионга лента коғозлар отишди. Стадионга худди қор ёққандек бўлди, ўйин жанговор 2:2 ҳисобида тугади. Барча голлар сўнгги 15 дақиқада киритилди. Энг кизиғи, “Наполи” гол урганда “Наполи” фанатларидан ташқари стадионнниг 40 фоизи гол дея бақириб ўрнидан турди. Кейин билсак, улар “Милан” мухлислари экан, улар “Интер”га қарши ҳамма ўйинда мухлислик қилишар экан. Бизнинг тепамизда ўтирган ота-ўғилнинг отаси “Милан”, ўғли эса “Интер” мухлиси экан. Ота “Наполи”га мухлислик қилиб ўтирибди, фанатларни мухлислик килишига эса гап йўқ.

"Рома" - "Бавария" ўйинидан аввал кайфиятлар аъло эди, аммо ўйиндан кейин...

Бир хил, бир овозда қўшиқларнинг айтилиши ва 90 дақиқа давомида бир дақиқа ҳам жим бўлишмади. Хаттоки мезбонлар мағлуб бўлаётган вақтда ҳам. Чунки уларда “семечка” йўқ экан... Ўйиндан ажойиб таассуротлар олиб, 21 октябрдаги “Рома” – “Бавария” ўйиннини кутдим. 21 октябрь эрталаб Римга, вокзалдан тўғри “Олимпия” стадионга бордик. Стадион атрофидаги барча кассалар ёпиқ эди, уларда чипта қолмади деб ёзиб қўйилган... Нима қилишни билмай атрофдагиларга мурожаат қилдик. Улар “Рома-Стор”га боришни маслаҳат беришди. Таксига ўтириб ўша жойга бордик, таксичи ҳам “Рома” фанати экан. У бизга қараб кулиб чипта ололмасанглар керак деди. Сабаби унинг ўзи ҳам чипта топа олмаган экан. Кайфият тушиб кетди, ноумид шайтон деб манзилга етиб бордик. Минг афсуски, ўйин учун чипталар бир ҳафта олдин тугаб бўлган дейишди... Ўрганиб қолганмиздек қўлда борми деб сўрадик, улар ҳайрон бўлиб, йўқ бизда ҳар бир одамга паспорт орқали сотилади дейишди. Бизнинг Ўзбекистондан келганимизни билиб бироз ачинди ҳам, ўзимнинг энг севимли клубимнинг ўйинини томоша қилиш учун Италияга боргандим.

• Мессининг "олтин тўп"лари
  

Бироқ “Рома-Стор”дан қуруқ кетмадим. Клуб формаларидан, шарфларидан, кийимларидан, қалпоқларидан сотиб олдим. Тушга яқин Рим кўчалари “Бавария” мухлислари билан тўлди, бар-кафе барча жойда немислар ашула айтиб юришибди... Ҳеч кимнинг улар билан иши йўқ, ҳеч ким ёмон гапирмаяпти, ҳатто “Рома” ва “Бавария” фанатлари бирга ўтириб пиво ичишди, расмга тушишди, чунки футбол бу – байрам, уруш эмас.

Ўйинни барда кўришга мажбур эдик, биз жойлашган меҳмонхона атрофидаги ҳеч қайси барда ўйинни қўймаяпти, бошқа ўйинни кўришяпти деб ҳайрон бўлдик, кейин билсак у ерлар “Лацио” мухлислари турадиган район экан. Учрашувни Колизей атрофидиги спорт-барлардан бирида томоша қилдик. Барда 20га яқин “Бавария” формасини кийиб олган немислар ҳам бор эди, улар мазза қилиб шиорлар айтиб туришди, ҳеч ким қаршилик қилмади хам, минг афсус ўйин...

• "Камп Ноу"га саёҳат
  

Нима бўлганини барча билади, гапиришнинг ҳожати йўқ . Мана бизда мухлислар сайтда ўтириб бир-бирини ҳақорат қилади, “сени жамоанинг унақа, меники бунақа деб”, бу ерда эса ҳамма дўст. “Бавария” “Рома” мухлислари билан, “Наполи” “Интер” мухлислари билан бирга ўтириб кулишиб расмларга тушишади. Лекин ҳақиқий дерби қанақа эканлигини билдим. “Интер” ўйинида “Милан” ёзуви туширилган нарса бўлиши керак эмас, ҳамма “қора-кўк” рангда, ҳатто стадиондаги “Милан” мухлислари ҳам “қора-қизил” рангда эмас. Дерби - дерби, лекин “Интер” ўйнамоқда, шунинг учун ҳам “Милан” формасини кийишмаган. Бу ҳам қандайдир ҳурмат бўлса керак, худди шундай “Милан” ўйинида “Интер” мухлислари келиб меҳмонларга мухлислик қилишар экан, лекин “Интер”нинг атрибутикаларисиз. Римда эса оддий мисол “лацио”ликлар ҳатто “Рома”нинг Чемпионлар лигаси ўйинларини ҳам кўришмас экан. Милан шаҳрида “Милан” – “Интер”, Римда “Рома” – “Лацио” ўйинларига ҳеч қайси уйин тенг келмас экан. Улар учун чемпион бўлишдан кўра мана шу ўйинларни ютиш шарт экан.

• Бу эса "Барселона" томонидан қўлга киритилган ЕЧЛ кубокларининг нусхалари
  

Сафар сўнггида Римдан Барселонага ҳам бордик. Ўша машҳур “Ноу Камп”га кирдик. Ўйин йўқ, лекин стадион атрофида юрган одамларни кўриб, худди бугун қандайдир ўйин бўлса керак деб ўйлайсиз. Улар стадион бўйлаб экскурсия қилгани келишган, бизга ўхшаб минглаб одамлар стадионга киришга навбатда туришди. Стадионга кирдик, кираверишдаги музейда “Барселона” ютган барча кубоклар, эски формалар, тўплар, Месси қўлга киритган 4та “Олтин тўп” ҳам бор. Стадион катталигидан одамни ютвораман дейди. Энг зўри стадион шунақа қулай қурилганки, хоҳлаган жойга ўтирсангиз футбол кўришга қулай, тепадами, пастдами, ўртадами, четдами барча жойдан бирдек кўринади. Шарҳловчилар ўтирадиган жойга кирдик, ўзимизча ўйинни шарҳладик, кийиниш хонасига кирдик, медиа-марказга, матбуот анжуман залларини кўрдик. Эсдалик учун Чемпионлар лигаси кубоги билан расмга тушдик. Клуб ўйин ўтказмаса ҳам пул оқиб келмоқда...Стадионга кунига беш минглаб одам кўргани келар экан. Кириш 20 евро. Бу ерда ўйин кунлари эса 90.000дан кўп одам келади. Чиптанинг ўртача нархи 150 евродан. Қанча бўлишини ўзингиз ҳисоблаб олаверинг. Очиғи, бизнинг чемпионат анча эмас, жуда ва жуда орқада экан, эҳ-хе...

Хулоса, Европадаги ўйин ва стадионларни маза қилиб кўриб, олам-олам таассурот олдим. Бунинг учун албатта FIFA.UZга раҳмат!