Элдорбек Суюнов: "Пенальти бўйича алоҳида тайёргарлик кўраман"

- "Мутахассислар ва мухлислар эътирофига сазовор бўлиш доимо ёқимли. Албатта энг яхши бўлиш футболчини янада кўпроқ ишлашга ундайди. Бу каби эътирофлар, совринлар футболчиларга қўшимча мотивация беради. ПФЛ ва "Championat.asia" ҳамкорликда йўлга қўйилган мазкур лойиҳа барча учун бирдек қизиқарли бўлди".

Элдорбек Суюнов шунингдек "Пахтакор"ни жуда муҳим баҳс кутаётганини таъкидлади.

- "Қўқонда бўладиган баҳсга қизғин тайёргарлик кўряпмиз. Бизни нақадар муҳим ва қийин ўйин кутаётганини тушуниб турибмиз. Қўқонда барча жамоаларга ҳар тарафлама қийин бўлмоқда. Шу боисдан ҳам мазкур учрашувга янада жиддий ҳозирланиш лозим. "Пахтакор" қаерда ўйнамасин доимо ғалаба кўзлайди. Насиб этса, Қўқон сафаридан ғалаба билан қайтиб, мухлисларимизни хурсанд қиламиз".

- "Пенальти? Айни пайтда машғулотларда одатдагидек тайёргарлик кўряпмиз. Ҳар машғулотлардан кейин жамоамизнинг штатли пенальтичилари ва жарима зарбаларини бажарувчилари пенальти, жарима зарбаларини амалга оширишади. Шу орқали стандарт вазиятларига тайёргарлик кўриб борилади. Аммо ҳозирча аниқ пенальти борасида шуғулланаётганим йўқ. Учрашувдан олдин мураббийларимиз рақибни ўрганиб, видео орқали таҳлил қилиб чиқиб, бизга айнан қайси жиҳатларга кўпроқ урғу беришимиз лозимлигини  кўрсатишади. Тўғри, Мурод Холмуҳаммедов ҳали "нуқта"дан адашгани йўқ. Албатта, бу учрашувда ҳам пенальти бўлиш эҳтимолини инобатга олиб алоҳида тайёргарлик кўраман. Футболда майда деталлар бўлмайди. Шу боисдан бўлиши мумкин бўлган барча жиҳатларни эътиборга олиш зарар қилмайди".

- "Ўйлашимча, Қўқонда мухлисларни ажойиб қарама-қаршилик кутмоқда", - деди июль ойининг энг яхши дарвозабони Элдорбек Суюнов.