Драган Скочич: "Натижа биз учун қониқарли бўлди"

Матбуот анжуманига дастлаб меҳмонлар устози Драган Скочич кириб келди ва журналистлар билан мулоқотга киришди.

"Ўйин натижаси биз учун қониқарли бўлди. Шу боис бу борада муаммо бўлмади. Асосийси меҳмондан ўзимиз учун керакли натижа билан қайтадиган бўлдик", - дея Драган Скочич ўз фикрларини билдириб ўтди.

- Кўп вазиятларда Исмоил Шарифатга эътирозлар билдирдингиз. Бунинг сабаби нимада?

- Нафақат ушбу футболчига, балки бутун жамоага кўп эътирозлар билдирдим. Бу ўйин билан боғлиқ эмас. Аксинча уларнинг майдондаги вақт чўзиш, учрашув бошидан сув ичишларига эътироз билдирдим. 

- Жамоа гуруҳдан чиқишига ишонасизми?

- Ҳозирдан бир нима демоқчи эмасман. Гуруҳимизда яхши ва кучли жамоалар йиғилишган. Агарда мусобақани яхши кайфият билан ўтказсак, ўйлайманки ўйлаган мақсадимизга эришамиз.

- Учрашув давомида "Фулад" майдон марказини бой бериб қўйгандек туюлди. Ҳимоя ва ҳужум орасини боғлаб турадиган футболчилар етишмагандек кўринди?

- Умуман олганда ҳар бир чизиқда хатоларга йўл қўйдик. Кўп вазиятда ўз ҳудудимизни бўш қолдирдик ва рақибга ҳужум қилиш имкониятини яратиб бердик. Ҳозирги кунда таркибимизда бир-иккита муаммолар бор. 10 нафар футболчимизни ҳарбий хизматга жалб этишгани туфайли улар бизга ёрдам бера олишмади.