"Динамо" осмонида "оқ булутлар". Бобир Абдихолиқовда биринчи хет-трик. "Бобур Арена"да "шерлар", "Бунёдкор"да "Нефтчи" ғолиб — Суперлиганинг 10-тури ҳақида

Хусусан, жамоалар қайд этган натижалар орқали айрим серияларга барҳам беришди, бир қатор маълумотларни янгилашди. Қуйида шу ҳақида батафсил. 

"Динамо" - "Қизилқум" 2:0

- Вадим Абрамов жамоасининг умумий ҳисобдаги 7 та ўйинлик ғалабасиз серияси якунига етди. "Динамо" сўнгги маротаба 28 март куни "Металлург"дан устун келган эди. 

- "Қизилқум" 7 йилдан бери "Динамо"ни меҳмонда енга олмаяпти. Навоийликлар охирги маротаба 2017 йилги мавсумда сафардан 3 очко билан қайтганди. 

- Жоэл Кожо "Динамо" либосидаги барча мусобақалардаги 22-голини урди. Бунинг учун унга 35 та ўйин керак бўлди. 

- 10 йилдан сўнг икки жамоа иштирокидаги учрашувда 2:0 ҳисоби қайд этилди. 

- "Қизилқум"нинг Суперлигадаги ғалабасиз ўйинлари 8 тага етди. Жамшид Саидов шогирдлари 11 мартдан буён 3 очко нималигини билмаяпти. 

"Навбаҳор" - "Олимпик" 0:0

- "Навбаҳор"нинг ўз майдонидаги мағлубиятсиз серияси 6 та беллашувга етди, 3 та ғалаба, 3 та дуранг. 

- "Олимпик" Суперлигада Наманганда ғалаба қозонишни уддасидан чиқмаяпти, 3 та ўйин, 1 мағлубият, 2 дуранг. 

- Ўзаро учрашувлар тарихида биринчи бор дарвозаларга гол урилмади (0:0). 

"Сурхон" - "Сўғдиёна" 1:0

- "Сурхон"га ғалаба келтирган гол муаллифи Беҳруз Шайдулов Суперлигадаги дебют голини урди. 

- "Сўғдиёна" 2 йилдан бери термизликлар дарвозасига йўл топа олаётгани йўқ.

- Жиззахликлар 2 йилдан бери "Сурхон"ни енгга олмаяпти. Жамоа рақиби устидан сўнгги ғалабасини 2022 йилги мавсумда Улуғбек Бакаев даврида қўлга киритганди. 

ОКМК - "Металлург" 1:0

- Миржалол Қосимов шогирдлари Тошкент вилояти дербисида 2 йилдан сўнг ютуқни ўзиники қилди. ОКМК охирги маротаба 2021 йилги мавсумда "Металлург" устидан зафар қучганди. 

- "Металлург"нинг Суперлигадаги ғалабасиз серияси 10 та ўйинга етди.   

- ОКМК уйда очко жамғариш жадвалида 13 очко билан биринчи ўринга чиқиб олди. 

"Бунёдкор" - "Нефтчи" 0:3

- "Нефтчи" жорий мавсумда биринчи маротаба битта ўйинда 3 та гол урди ва йирик ҳисобдаги ғалабани тантана қилди. 

- "Бунёдкор" сўнгги кетма-кет 2 та ўйинда дарвозасидан 7 та тўп олиб чиқди. 

- "Нефтчи" 9 йилдан сўнг яна "Бунёдкор" стадионида "қалдирғочлар"га ҳеч қандай имконият қолдирмади. 

"Андижон" - "Пахтакор" 1:3

- "Пахтакор" 4 йилдан сўнг "Андижон" майдонида муваффақиятга эришди. 

- Максим Шацких "шерлар" бошқарувида биринчи маротаба "Андижон"ни мағлуб этди. 

- "Бургутлар"нин Суперлигадаги ғалабасиз ўйинлари сони 5 тага етди. 

- Пойтахт клуби сўнгги 4 та ўйинда мағлубиятга учрагани йўқ. 

- Бектемир Абдуманноновнинг ассистлари сони 7 тага етди.

"Насаф" - "Локомотив" 3:0

- Бобир Абдихолиқов 1290 кундан (3 йил, 6 ой, 13 кун) сўнг Ўзбекистон Суперлигасида гол урди. Сўнгги бор ҳужумчи 2020 йилнинг 20 ноябрь санасида "Сўғдиёна"га гол урганди.

- Бобир Абдихолиқов Ўзбекистон чемпионатида саккизинчи марта дубль расмийлаштирди. Унинг Суперлигадаги жами голлари сони 47 тага етди.

- "Насаф" 6 йилдан сўнг Қаршида "Локомотив"ни енгди. "Аждарлар" охирги маротаба 2018 йил бу вазифани бажарганди. 

- Бобир Абдихолиқов Ўзбекистон чемпионатида ўзининг биринчи хет-трикини қайд этди. У 2022 йил Беларусь чемпионатида "Энергетик БГУ" сафида "Неман" билан баҳсда ҳам хет-трик расмийлаштирганди.

- "Локомотив" Суперлигада 7 та баҳсдан буён ғалаба нималигини билмаяпти. Жамоа охирги бор 14 март куни "Пахтакор" устидан зафар қучганди.