"Бунёдкор" майдонига нима бўлди? Стадион директори батафсил маълумот берди

Ушбу ўйинларда "Бунёдкор" стадиони майсаси ҳолати кўпчиликнинг эътиборини тортгани бор гап. Сентябрь ойидан бошлаб ушбу стадионда Ўзбекистон миллий терма жамоаси Жаҳон чемпионати саралаш ўйинларини ўтказишни бошлайди. Жуда ҳам муҳим баҳслардан олдин майдон ҳолати идеал бўлиши керак. Биринчи даврада бу стадионда "Бунёдкор"дан ташқари "Бухоро" ҳам уй ўйинларини ўтказди. Иккинчи даврада эса "Бунёдкор" билан бирга "Локомотив" ўз уй ўйинларини ўтказишни бошлади. "Пахтакор" ҳам Элит Осиё чемпионлар лигаси доирасидаги ўйинларни шу майдонда ўтказади.

Майдоннинг ҳолатини билиш учун "Бунёдкор" стадиони бош директори Шерзод Ҳақбердиев билан боғландик.

"Биласиз стадион ичида ҳаво айланмайди, ҳаво ҳам 45 даража иссиқдан пастга тушмади. Ўтган йил ёзги чилладан кейин ҳам шундай ҳолат кузатилганди. Ҳаво ҳарорати пасайгач, барчаси ўз жойига тушади ва майдон яна ўз ҳолатига қайтади. Айни пайтда стадион ходимлари ёрдамида майдон ичида микроиқлим яратдик. Бунда сув майса устига кучли шамол орқали сепилади.

Эсингизда бўлса, икки йил аввал майдонимизга сунъий чим экилганди. Қоидаси бўйича бундай стадионларда бир йилда бир марта сунъий майсанинг усти тозаланиб туриши ва табиий майса учун уруғ экиш керак. Уруғ экиш учун энг қулай муддат баҳор ёки куз фасли. Ўтган йил бизда вақт бўлганди шуни амалга оширгандик. Бу йил эса вақт етарли бўлмади ва ҳозиргача тозалов ишларини амалга ошира олмадик. Насиб қилса режамиз бўйича ноябрь ойида тозалаш ва уруғ экиш жараёнини амалга оширамиз.

Албатта табиий майдонда тез-тез ўйинлар ўтказлиши ҳам майса сифатига таъсир қилмасдан қолмайди. Шунга қарамай, стадион бўлажак муҳим ўйинларда идеал ҳолатда бўлиши учун бор кучимиз билан ишлаяпмиз", - деди "Бунёдкор" стадиони бош директори Шерзод Ҳақбердиев.