«Бунёдкор», «Локомотив» ва «Насаф» ОЧЛ-2014да ўйнайди

Унга кўра, Ўзбекистондан учта жамоа ОЧЛ-2014 йўлланмасига эга бўлди.

26 ноябрь, сешанба куни ОФК Ижроия қўмитаси Осиё Чемпионлар лигасининг келаси мавсумлари учун бир қатор қарорларни эълон қилди. Унга кўра, кейинги уч йил давомида мусобақа финали уй-сафар тизимида ташкил этилади. Бундан ташқари, мусобақа ярим финалига қадар ОЧЛ иштирокчилари ўз минтақалари (Шарқ ва Ғарб) доирасидаги рақибларга қарши тўп суришади.

Қўмита, шунингдек, 2014 йилги мавсум учун Осиё Чемпионлар лигаси учун квоталар сонини ҳам белгилади. Унга кўра, Ўзбекистонга 1+2 (бир жамоа («Бунёдкор») бевосита гуруҳ босқичидан, яна икки жамоа («Локомотив» ва «Насаф») эса саралаш босқичларидан мусобақага қўшилади) кўринишида квота ажратилди. Қайд этиш жоиз, 2013 йилги мавсумда Ўзбекистон жамоалари («Пахтакор», «Бунёдкор» ва «Локомотив») ОЧЛда 2+1 квотаси билан иштирок этган эди.

2014 йилги ОЧЛ баҳсларида Шарқий минтақада Сингапур, Гонгконг, Вьетнам, Ғарбий минтақада эса Ҳиндистон, Иордания, Уммон, Баҳрайн, Ироқ ва Кувайт клублари ҳам иштирок этишади. ОЧЛдаги барча иштирокчилар учун ажратилган квоталар билан қуйида танишишингиз мумкин:

ШАРҚ
Япония – 4;
Жанубий Корея – 4;
Хитой – 3+1;
Австралия – 2+1;
Таиланд – 1+2;
Сингапур – 0+1;
Гонгконг – 0+1;
Вьетнам – 0+1.

ҒАРБ
Эрон – 4;
Саудия Арабистони – 4;
БАА – 3+1;
Қатар – 2+2;
Ўзбекистон – 1+2;
Ҳиндистон – 0+1 (Ҳиндистон клуби Шарқий зонада ўйнайди);
Иордания – 0+1;
Уммон – 0+1;
Баҳрайн – 0+1;
Ироқ – 0+1;
Кувайт – 0+1.

ОЧЛ-2014га қуръа ташлаш маросими 10 декабрь, сешанба куни бўлиб ўтади.