“Бунёдкор” “Эмирейтс” клуби билан ҳамкорликни йўлга қўймоқда

Мурод Алиев клуб Бош директори лавозимида иш бошлагач, биринчи навбатда Академия фаолияти ислоҳ қилинишига жиддий эътибор қаратди. Мураббийлар малакасини ошириш, ёш иқтидорли ўйинчиларга алоҳида урғу бериб, уларни бош жамоа машғулотларида иштирок этишини тизимли равишда таъминлаш йўлга қўйилди.

Куни кеча “Бунёдкор” футбол клуби Бош директор ўринбосари Зокиржон Холиқов БАА давлатига сафар уюштириб, “Эмирейтс” футбол клуби ва Академиясининг фаолияти билан яқиндан танишди ва расмийлар билан учрашди. Айтиш керакки, “Эмирейтс” БАА Про лигаси иштирокчиси ҳисобланади. Жамоа ёзги трансфер ойнаси вақтида таркибини жаҳон футбол юлдузи Андреас Иньеста билан кучайтирди. Ҳали ҳам майдонда жавлон ураётган испаниялик юлдуз дунёнинг бир қатор мамлакатларида ўз футбол Академиясига асос солган.

Зокиржон Холиқов “Эмирейтс” футбол клуби директорлар кенгаши раиси Юсуф Абдуллоҳ Ал Батран ва Андреас Иньеста билан самимий руҳда ўтган учрашувда Академиялар фаолияти, иш тизими ҳақида суҳбатлашди. Шунингдек, “Бунёдкор” Академияси жамоаларини БААда ташкил этиладиган мусобақаларда қатнашиши тўғрисида сўз борди. Жумладан, БАА давлатида ўтказиладиган болалар турнирларида иштирок этадиган “Бунёдкор” Академияси жамоалари учун “Эмирейтс” футбол клуби томонидан барча шароитлар яратиб берилади. Юсуф Абдуллоҳ Ал Батран “Бунёдкор” ҳақида етарлича маълумотга эга эканлигини таъкидлаб, ўзбекистонлик футболчиларга ҳурмати баланд эканлигини маълум қилди. Хусусан, ўз вақтида “Бунёдкор” ва “Эмирейтс” футбол клубида тўп сурган Жасур Ҳасановни “бизники” дер экан, нафақат Академия жамоаларига, балки бош жамоамиз БААда ўқув-йиғин машғулотлари ўтказса, моддий манфаатларсиз клубга тегишли майдонлардан фойдаланишига рухсат берилишини билдирди.

Суҳбат давомида жаноб Юсуф Абдуллоҳ Ал Батран, албатта тез орада Ўзбекистонга ташриф буюришини ҳамда “Бунёдкор” футбол клуби билан яқиндан танишишини таъкидлади.