Бугун футбол. "Қўқон-1912" - "Навбаҳор"

Бугун Қўқон шаҳрида жуда қизиқарли баҳс кечиши кутилмоқда. Бунга сабаб, бугун мухлислар водий дербисига гувоҳ бўлишади. Турнир жадвалида жуда қизиқ вазият юзага келган. Иккала жамоа ҳам ёнма-ён ўринларда бормоқда. "Қўқон-1912" 37 очко билан 6-ўринни эгаллаб турган бўлса, "Навбаҳор" ундан бир очко кам жамғарган ҳолда 7-ўринда бормоқда. 

Биласизми? "Қўқон-1912" ҳозирча икккинчи даврада уч марта ғалаба эришган ва учаласи ҳам уйдаги ўйинларда қўлга киритилган. Жамоа ўз майдонида "Обод", "Нефтчи" ва "Шўртан"дан устун келган. Бундан ташқари, қўқонликлар уйдаги баҳсларда бир марта ютқазиб қўйишган. 

"Навбаҳор"га келадиган бўлсак, бу жамоа иккинчи даврада анча кучайди. Хусусан жамоа иккинчи давранинг дастлабки тўртта учрашувидан учтасида ғолиб чиқди. "Навбаҳор" ўз майдонида "Пахтакор"ни ютиб анча шов-шув кўтарганди, бироқ кейинги турда "Локомотив"га имкониятни бой бергач, шов-шув тезда унутилди. 

Бугун "Навбаҳор" сафарда жиддий жамоага қарши баҳс олиб боради. Илҳом Мўминжонов шогирдлари ҳозирча иккинчи даврада сафар ўйинларида фақат бир марта ғалаба қозонишди. Тошкентда "Обод" мағлуб этилганидан бери "Навбаҳор" сафарда "Нефтчи" ва "Шўртан" билан дуранг ўйнаган бўлса, "Машъал" ва "Локомотив"га имкониятни бой берди. 

Факт: "Навбаҳор" мавсум бошидан бери сафарда фақат икки бор зафар қучган. Жамоа "Динамо" ва "Обод" клубларини мағлуб этиб қайтган.