Бугун футбол. "Навбаҳор" - "Локомотив"

Ушбу мавсумда иккинчи ўринни нақд қилган "Локомотив" бугун Наманганда "Навбаҳор" меҳмони бўлади. Жамоалар аввалги турда икки хил натижа қайд этишди. "Локо" сафарда "Андижон"ни йирик 4:0 ҳисобида мағлуб этган бўлса, "Навбаҳор" Тошкентда "Бунёдкор"га 1:2 ҳисобида имкониятни бой берди. 

Бугунги баҳс "Локомотив"нинг сафардаги 13-ўйини бўлади. "Темирйўлчилар" шу пайтгача сафарда уч марта ғалаба қозонишган: "Насаф", "Бухоро" ва "Андижон" мағлуб этилган. Сафар ўйинларида тўплар нисбати 14-11. Қизиғи шундаки, "Локо" сафарда ғалаба қозонган ўйинларда ўз дарвозасидан гол ўтказмаган. 

Ўз майдонида 12та учрашув ўтказган "Навбаҳор" шундан 4тасида ғалабага эришган. Наманганликлар уйда "Сурхон", "Сўғдиёна", "Бухоро" ва "Динамо" клубларидан устун келишган. Шунингдек тўрттадан ўйинда дуранг ва мағлубият қайд этилган. 

Биласизми? "Локомотив" охирги уч турнинг иккитасини ғалаба билан якунлади. "Темирйўлчилар" уйда "Бухоро" ва сафарда "Андижон"дан устун келишди. "Навбаҳор" эса охирги уч турдан бери ғалаба қозона олмаяпти. Бу жамоа ҳисобида иккита дуранг ва бир мағлубият бор. Шу ўринда Наманганда бўлиб ўтган охирги бешта ўйинни ёдга оладиган бўлсак, шундан учтасида "Локо"нинг қўли баланд келган. Биттадан ўйинда "Навбаҳор" дуранг ва ғалаба қайд этган. 

2018 й. Биринчи босқич. "Навбаҳор" - "Локомотив" 0:3

2018 й. Иккинчи босқич. "Навбаҳор" - "Локомотив" 2:0

2017 й. "Навбаҳор" - "Локомотив" 2:2 

2016 й. "Навбаҳор" - "Локомотив" 2:3

2015 й. "Навбаҳор" - "Локомотив" 2:3