Бугун футбол. "Динамо" - "Навбаҳор"

Самарқанднинг "Динамо" клуби ўз майдонида "Навбаҳор"ни қабул қилади. Турнир жадвалида ҳар икки жамоа 7 очко билан ёнма-ён ўринларни эгаллаб турибди. Бугун "Динамо" ўз майдонида тўртинчи учрашувини ўтказади. Даврон Файзиев шогирдлари бунгача икки бор ғалабага эришиб, битта дуранг қайд этишди. Жамоанинг иккита мағлубияти фақат сафар ўйинларида қайд этилди. 

Биласизми? "Динамо" охирги иккита уй учрашувини ғалаба билан якунлади. Жамоа "Металлург" (2:1) ва "Сўғдиёна"дан (1:0) устун келди. 

Сафарда бунгача битта мағлубият ва бир ғалаба қайд этган "Навбаҳор" бугун учинчи ўйинини ўтказади. Қаршида "Насаф"ни 1:0 ҳисобида мағлуб этиб қайтган Канчельскис шогирдлари ўтган турда "Сурхон" дарвозасига жавобсиз учта тўп киритишди. Демак, "Навбаҳор" охирги икки ўйинда ўз дарвозасидан гол ўтказмади. 

2017 йил. "Динамо" - "Навбаҳор" 0:1

2015 йил. "Динамо" - "Навбаҳор" 2:1 

2014 йил. "Динамо" - "Навбаҳор" 2:0 

2013 йил. "Динамо" - "Навбаҳор" 1:1 

2012 йил. "Динамо" - "Навбаҳор" 2:0 

Самарқандда ўтказилган охирги бешта ўйинда "Навбаҳор" фақат бир марта ғалаба қозонган. Учта ўйинда майдон эгаларининг қўли баланд келган ва бир учрашув дуранг билан якун топган. Охирги беш учрашувда "Динамо" рақиб дарвозасига 7та гол уриб, ўз дарвозасидан 2та тўп ўтказиб юборган. 

Бугунги беллашувда имконият "Навбаҳор"да кўпроқдек кўринмоқда. Чунки жамоа ўз таркибини анча шакллантириб олди. Шунингдек, "Навбаҳор"да ўйин савияси ҳам бирмунча юқори. Лекин "Динамо" ўз уйида тўп тепади, бу эса учрашув анча жанговор кечишини англатади.