Бугун футбол. "Бухоро" - "Қўқон-1912"

17:00 - “Бухоро” (Бухоро) – “Қўқон-1912” (Қўқон)

Ҳакамлар: В. Серазетдинов (Тошкент), А. Цапенко (Тошкент вил.), Р. Шояхметов (Тошкент), И. Худайдатов (Тошкент)

Назоратчи: А. Хотамов (Тошкент)

ЎзПФЛ вакили: Р. Черников

Ҳозирда жамоаларни бир-биридан икки очко ажратиб турибди. Негаки "Бухоро" 42, "Қўқон-1912" эса 40 очко тўплаган. Бугун Бухоро шаҳрида қизиқарли баҳс бўлиб ўтиши кутилмоқда. 

Иккинчи даврада иккала жамоа ҳам ўзгарди. Хусусан "Бухоро" иккинчи давра старт олгач, кетма-кет тўққизта ўйинда мағлуб бўлмади. Жамоа 10-ўйинига келиб мағлубиятга учради ва бу ҳол "Пахтакор" билан ўйинда рўй берди. 

Биласизми? "Бухоро" охирги иккита баҳсда ютқазиб қўйди. Жамоа ўз майдонида "Пахтакор"га ва сафарда "Навбаҳор"га имкониятни бой берди. Ҳар иккала беллашувда ҳам бухороликлар гол ура олишмади. 

Факт: "Бухоро" ўз майдонида кечган баҳсларнинг фақат учтасида мағлуб бўлган. Энг қизиғи, учала клуб ҳам Тошкент жамоалари. Жамоа "Обод", "Локомотив" ва "Пахтакор" қаршилигини енга олмаган. 

"Қўқон-1912" иккинчи даврада ҳозирча тўртта ғалабага эришди ва барча ғалабалар уйдаги ўйинларда қўлга киритилди. Лекин сафар баҳсларида бу жамоанинг ишлари беш деб бўлмайди. 

Биласизми? "Қўқон-1912" иккинчи даврада сафарда олтита ўйинда майдонга тушиб, фақат биттасида гол урган. Жамоа "Динамо" билан 0:0 ўйнаган бўлса, қолган учрашувларда мағлуб бўлган. 

Ўйинни ким бошқаради? Мазкур баҳс бош ҳаками Виктор Серазетдинов жорий мавсум ҳисобидан Бухорога биринчи бор ташриф буюради. Серазетдинов бунгача бухороликларнинг иккита сафар учрашувида ҳакамлик қилган. 

Қолаверса, тошкентлик ҳакам "Қўқон-1912" иштирокидаги баҳсни иккинчи бор бошқаради. Биринчисида "Қўқон-1912" сафарда йирик ҳисобда мағлуб бўлган.