Бенземанинг қанча муддатга сафдан чиққани маълум бўлди

Мадриднинг "Реал" клуби ҳужумчиси Чемпионлар лигаси гуруҳ босқичи 1-турида "Селтик"га қарши ўйиннинг 30-дақиқасида жароҳат олиб, алмаштирилди (3:0).

Бугун ҳужумчи тиббий кўрикдан ўтказилди, шундан сўнг унинг жароҳати жиддий эмаслиги маълум бўлди.

Текширув натижаларига кўра, Бенземага тизза бўғимининг яллиғланиши ташхиси қўйилган. Футболчи чамаси 7-10 кун вақтни тикланишга сарфлайди.

Кўп вақт ўтмай, Мадрид клуби Каримда сон мушакларининг жароҳати ташхиси қўйилганини эълон қилди.

Шу тариқа, франциялик футболчи якшанба куни "Мальорка"га қарши баҳсда майдонга тушмайди, унинг 14 сентябрь куни бўлиб ўтадиган "Лейпциг"га қарши ўйиндаги иштироки ҳам сўроқ остида қолмоқда. Катта эҳтимол билан Бензема 18 сентябрь куни "Атлетико"га қарши ўйинда майдонга туша олади.