Банега "Ал Шабаб" билан шартномани бекор қилмоқчи

Аргентиналик ярим ҳимоячи Эвер Банега Саудия Арабистонининг "Ал Шабаб" клуби билан шартномасини бекор қилиш истагида, деб хабар бермоқда "D Sports Radio".

Хабар қилинишича, 35 ёшли фахрий ўзининг жонажон жамоаси "Бока Хуниорс"га қайтишга тайёр. Унинг "Ал Шабаб" билан келишуви жорий мавсум охиригача амал қилганди.

Эслатиб ўтамиз, Эвер Банега Испаниянинг "Севилья" жамоаси сафида 150 дан ортиқ ўйин ўтказган ва у билан уч марта Европа Лигасида ғолиб бўлган. Ярим ҳимоячи Испаниянинг "Валенсия" ва "Атлетико", Италиянинг "Интер" клубларида ўйнаган. Бундан ташқари, Банега Аргентина терма жамоаси сафида 65 та ўйин ўтказиб, 6 та гол урди ва у билан 2 марта Америка Кубоги финалига чиққан.